வழங்கிய வாக்குறுதிகளை உடன் நிறைவேற்றுமாறும், சம்பள முரண்பாட்டினை சரி செய்யத்தவறியமை, 2015 ஆம் வருட முறைகேடான சம்பளக் கொள்ளை மற்றும் ஊழல் மற்றும் மோசடிகளுக்கு எதிராக, இலங்கை மின்சார சபை ஊழியர்கள் இன்று யாழ்ப்பாணத்தில் பணிப்புறக்கணிப்பில் ஈடுபட்டனர்.
வட மாகாண பிராந்திய முகாமையாளர் அலுவலத்தில் இன்று நண்பகல் 12.00 மணியளவில் கற்பூரம் கொழுத்தியும் தேங்காய் உடைத்தும் தமது எதிர்ப்பினையும் கண்டனத்தினையும் வெளியிட்டனர்.
2015 ஆம் ஆண்டு சம்பள முரண்பாட்டிற்கு தீர்வு வேண்டும், மக்கள் பணத்தினை கொள்ளையிடும் ஊழல் பேர்வழிகளுக்கு தண்டனை வழங்கு, இலங்கை மின்சார சபை என்.வி.கியு அடிமைச் சேவகத்தினை உடன் நிறுத்து, தொழிற்சங்க அடக்கு முறை மற்றும் பழி வாங்கல்களை உடன் நிறுத்து, இலங்கை மின்சார சபை ஊழியர் சேமலாப நிதிய நிதி மோசடிக்கு உடனடி தீர்வு வேண்டும், இலங்கை மின்சார சபை தொழில்நுட்ப ஊழியர்களுக்கு இடர் கொடுப்பனவை உடன் வழங்கு போன்ற கோரிக்கைகளை முன்வைத்து பணிப்புறக்கணிப்பில் ஈடுபட்டனர்.
இந்த பணிப்புறக்கணிப்பு போராட்டம் இன்று முன்னெடுக்கப்பட்டதுடன், நாளையும் முன்னெடுக்கப்படவுள்ளது.
இந்நிலையில் இரண்டு நாட்களுக்குள் தீர்வு கிடைக்காவின் மீண்டும் தொடர் போராட்டத்தை முன்னெடுக்கவுள்ளதாக இலங்கை மின்சார சபை ஊழியர்கள் தெரிவித்துள்ளனர்.
