சீரற்ற காலநிலை காரணமாக சில மாவட்டங்களுக்கு மண்சரிவு எச்சரிக்கை விடுக்கப்பட்டுள்ளதாக அனர்த்த முகாமைத்துவ மத்திய நிலையம் எச்சரிக்கை விடுத்துள்ளது.
களுத்துறை, கேகாலை மற்றும் இரத்தினபுரி மாவட்டங்களுக்கே குறித்த மண்சரிவு எச்சரிக்கை அனர்த்த முகாமைத்துவ மத்திய நிலையத்தால் விடுக்கப்பட்டுள்ளது.
ஆகவே மண் சரிவு அபாயம் ஏற்படுவதற்கான அறிகுறிகள் தென்படும் பிரதேசங்களிலிருந்து மக்கள் வெளியேறி பாதுகாப்பான இடங்களில் தங்குமாறும் அனர்த்த முகாமைத்துவ மத்திய நிலையம் தெரிவித்துள்ளது. குறித்த எச்சரிக்கை 24 மணி நேரத்திற்கு அமுலில் இருக்குமென்றாலும் தொடர்ந்து மழைபெய்தால் அவ்வெச்சரிக்கை நீடிக்கும்.
இது தொடர்பில் அனர்த்த முகாமைத்துவ மத்திய நிலையத்தின் உதவிப் பணிப்பாளர் பிரதிப் கொடிப்பிலி கருத்து தெரிவிக்கையில், இரத்தினபுரி, நுவரெலியா உட்பட மத்திய மலைநாட்டின் சில பிரதேசங்களிலும் களுத்துறை, காலி ஆகிய மாவட்டங்களிலும் தற்போது மழையுடன்கூடிய காலநிலை நிலவுகிறது.
எனவே தேசிய கட்டிட ஆய்வு மையம் தற்போதைக்கு கேகாலை, இரத்தினபுரி மற்றும் களுத்துறை மாவட்டங்களுக்கு மண்சரிவு எச்சரிக்கை விடுத்துள்ளது.
இதேவேளை, மேல், மத்திய, வடக்கு மற்றும் சபரகமுவ மாகாணங்களில் அடுத்து வரும் 24 மணித்தியாலங்களில், 100 மில்லி மீட்டருக்கு அதிமான மழை வீழ்ச்சி பதிவாக கூடும் என வளிமண்டலவியல் திணைக்களம் எதிர்வு கூறியுள்ளது.
மழை பொழியும் போது தற்காலிகமாக கடும் காற்று வீச கூடும் என அத் திணைக்களம் வெளியிட்டுள்ள அறிக்கை ஒன்றில் குறிப்பிடப்பட்டுள்ளது.
