பிராந்திய இந்து சமுத்திர மாநாடு நாளை வியாழக்கிழமை அலரி மாளிகையில் ஆரம்பமாக உள்ளது. இந்த மாநாட்டில் கலந்துகொள்ள இந்தியா , அமெரிக்கா மற் றும் அவுஸ்திரேலியா உள்ளிட்ட 17 நாடுகளின் பிரதிநிதிகள் இலங்கைக்கு விஜயம் செய்ய உள்ளதாக சட்ட ஒழுங்குகள் அமைச்சர் சாகல ரத்நாயக்க தெரிவித்தார்.
அந்தவகையில் இந்திய வெளிவிவகார அமைச்சர் சுஷ்மா சுவராஜ் மற்றும் தெற்கு , மத்திய ஆசிய விவகாரங்களுக்கான அமெரிக்க பதில் இராஜாங்க செயலாளர் ஹெலிஸ் வேல்ஸ் உள்ளிட்டவர்கள் இன்று இலங்கைக்கு விஜயம் செய்ய உள்ளதாகவும் குறிப்பிட்டார்.
இந்து சமுத்திர மாநாடு தொடர்பில் நேற்று செவ்வாய்கிழமை அலரி மாளிகையில் இடம்பெற்ற ஊடக சந்திப்பின் போதே வெளிவிவகார அமைச்சர் மேற்கண்டவாறு தெரிவித்தார்.
இதன்போது உரையாற்றிய சட்ட ஒழுங்குகள் அமைச்சர் சாகல ரத்நாயக்க கூறுகையில் ,
டில்லியைத் தளமாகக் கொண்டு செயற்படும் இந்திய மன்றத்தின் ஏற்பாட்டில் இந்து சமுத்திர பாதுகாப்பு மாநாடு நாளை வியாழக்கிழமை ஆரம்பமாக உள்ளது. அலரி மாளிகையில் நடைபெறவுள்ள இந்த மாநாட்டில் இந்தியா , அமெரிக்கா மற்றும் அவுஸ்திரேலியா உள்ளிட்ட 17 நாடுகளின் பிரதிநிதிகள் பங்குப்பற்ற உள்ளனர்.
2016 ஆம் ஆண்டு சிங்கப்பூரில் இடம்பெற்ற இந்து சமுத்திர மாநாட்டை பிரதமர் ரணில் விக்ரமசிங்க தலைமைத்தாங்கி நடத்தி வைத்தார். இம் முறை இலங்கையில் நடாத்துவதற்கு இந்த வாய்ப்பு கிடைத்தமை முக்கியமானதாகும். இந்து சமுத்திர பொருளாதாரத்திற்கு மற்றும் அல்ல உலக பொருளாதாரத்தில் இந்து சமுத்திரத்தின் முக்கியத்தும் தொடர்பில் கருத்தில் கொள்ளப்பட்டுள்ளது.
இந்து சமுத்திரத்தின் முக்கிய மையப்பகுதியில் இலங்கை உள்ளமையினால் வலயத்தில் பாதுகாப்பு மற்றும் நிலையான அமைதி என்பவற்றில் எமக்கும் பொறுப்புகள் உள்ளன. குறிப்பாக இலங்கையின் உள்நாட்டு போர் முடிவடைந்துள்ளமையினால் ஆயுத கடத்தல்களுக்கு வாய்ப்பில்லை. ஆனால் பிராந்தியத்திற்குள் ஆயுத கடத்தல் காணப்படுகின்றது .இலங்கையை பொறுத்த வரையில் போதைப்பொருள் கடத்தல் குறித்தே கூடிய கவனம் செலுத்தப்பட வேண்டியதுள்ளது. மாநாட்டில் இலங்கை இந்த விடயத்தில் கூடிய கவனம் செலுத்தும்.
இதில் பங்கேற்பதற்காக இந்திய வெளிவிவகார அமைச்சர் சுஷ்மா சுவராஜ் , மத்திய ரெயில்வே அமைச்சர் ஸ்ரீ சுரேஷ் பாபு மற்றும் வெளிவுறவு செயலளர் எஸ். ஜெயசங்கர் உள்ளிட்டவர்கள் இன்று இலங்கைக்கு வருகின்றனர்.
அதே போன்று தெற்கு , மத்திய ஆசிய விவகாரங்களுக்கான அமெரிக்க பதில் இராஜாங்க செயலாளரும், ஆப்கானிஸ்தான் மற்றும் பாகிஸதானுக்கான விஷேட பிரதிநிதியுமான ஹெலிஸ் வேல்ஸ் மாநாட்டில் கலந்துக் கொள்வதற்காக நாளை வியாழக்கிழமை இலங்கைக்கு விஜயம் மேற்கொள்ள உள்ளார்.
மேலும் சிஷெல்ஸ் துணை அதிபர் வின்சன்ட் மெரிட்டன், சிங்கப்பூர் வெளிவிவகார அமைச்சர் விவியன் பாலகிருஷ்ணன், உள்ளிட்ட 150 மேற்பட்ட சர்வதேச பிரதிநிதிகள் இலங்கைக்கு மாநாட்டை முன்னிட்டு இலங்கைக்கு விஜயம் செய்ய உள்ளனர்.
அத்துடன் பங்களாதேஸ், ஜப்பான், நேபாளம், சிறிலங்கா, மொறிசியஸ், வியட்னாம், ஆகிய நாடுகளின் அமைச்சர்கள் , அமெரிக்கா, அவுஸ்ரேலியா, இந்தியா, இலங்கை, பங்களாதேஸ், ஜேர்மனி, கென்யா, தென்கொரியா, ஆப்கானிஸ்தான் ஆகிய நாடுகளின் மூத்த அதிகாரிகளும் இந்தக் கருத்தரங்கில் பங்கேற்கவுள்ளமை குறிப்பிடத்தக்கது.
இந்து சமுத்திர பிராந்தியத்தின் அமைதி, பாதுகாப்பு , அபிவிருத்தி ஆகிய தொனிப் பொருள்களில் இந்த மாநாடு முன்னெடுக்கப்பட உள்ளது. பிரதமர் ரணில் விக்கிரமசிங்க இந்த மாநாட்டிற்கு தலைமைத்தாங்க உள்ளார். அதே போன்று ஜனாதிபதி மைத்திரிபால சிறிசேன இதன் போது சிறப்புரை நிகழ்த்த உள்ளார் என்றார்.
