முள்ளிவாய்க்கால் நினைவேந்தல் செய்தவர்களை வவுனியாவில் இயங்கும்தென்பகுதியைச் சேர்ந்த நிறுவனம் ஒன்று வேலையில் இருந்து இடைநிறுத்தியுள்ளது என்று தெரிவிக்கப்படுகின்றது. பணிநீக்கியதற்கான காரணம் தற்போது கூற முடியாது என்று அந்த நிறுவனம் தெரிவித்தது.
அந்த நிறுவனத்தில் முல்லைத்தீவு கிளிநொச்சி மாவட்டங்களைச் சேர்ந்த 7 பேர் பணிபுரிகின்றனர். அவர்கள் கடந்த வியாழக்கிழமை தாம் பணிபுரியும் அலுவலகத்தில் பணிநேரம் நிறைவடைந்த பி்ன்னர் மாலை 5.30 அளவில் மே 18 நினைவேந்தல் நிகழ்வை நினைவு கூர்ந்துள்ளனர் என்று தெரிவிக்கப்படுகின்றது.
அதை அறிந்த குறித்த நிறுவன தலைமை அதிகாரிகள் மறுநாள் குறித்த 7 பேரையும் பொலிஸாரிடம் ஒப்படைத்து விசாரணை செய்யுமாறு கோரியுள்ளனர். அவர்கள் பொலிஸாரால் விசாரணைக்கு உட்படுத்தப்பட்டனர்.அதன்பின்னர் 7 பேரும் பணிநீக்கம் செய்யப்பட்டனர்.
பணிநீக்கம் செய்யப்பட்டமை தொடர்பில் நிறுவனத்தினரிடம் தொடர்புகொண்டு கேட்டபோது, பணிநீக்கம் செய்யப்பட்டதற்கான காரணத்தைத் தற்போது கூறமுடியாது. நாளை கூற முயற்சிக்கிறோம் என்றனர்.
