ஜனாதிபதித் தேர்தலும் பொதுத் தேர்தலும் நிறைவடைந்தவுடன் அமைதிகாத்த ஜனாhதிபதி அநுரகுமார திஸாநாயக்க தற்போது உள்ளுராட்சிமன்றத் தேர்தலை இலக்கு வைத்து உயிர்த்த ஞாயிறு தாக்குதல்கள் தொடர்பில் பேச ஆரம்பித்திருக்கின்றார். அவரது பேச்சுக்களை நம்ப நாம் தயாராக இல்லை. முடிந்தால் முன்னாள் அமைச்சர் டிரான் அலஸை கைது செய்யுமாறு அரசாங்கத்துக்கு சவால் விடுப்பதாக ஹிருணிகா பிரேமசந்திர தெரிவித்தார்.
கொழும்பில் திங்கட்கிழமை (31) ஊடகங்களுக்கு கருத்து வெளியிடும் போது இதனைத் தெரிவித்த அவர் மேலும் குறிப்பிடுகையில்,
சமூக வலைத்தளங்கள் ஊடாக ஏனைய கட்சியினர் மீது சேறு பூசினால் மாத்திரம் போதும் என்று அரசாங்கம் எண்ணுகிறது. ஆனால் இன்று நிலைமை முற்றாக மாறியுள்ளது.
கடந்த தேர்தல்களைப் போன்று இம்முறை பொய் கூறி வெற்றி பெற முடியாது. உள்ளுராட்சிமன்றத் தேர்தல் முடிவுகள் நிச்சயம் மாற்றத்தை ஏற்படுத்தும் என்று நம்புகின்றோம்.
பாராளுமன்றத்தில் அரசாங்கத்துக்கு எதிராக குரலெழுப்புபவர்கள் கைது செய்யப்படுகின்றனர். அந்த வகையிலேயே பாராளுமன்ற உறுப்பினர் சாமர சம்பத் தசநாயக்க கைது செய்யப்பட்டிருக்கின்றார்.
ஆனால் தாம் ஆட்சியமைத்தால் அர்ஜூன மகேந்திரனின் காதுகளைப் பிடித்து இழுத்து வருவோம் எனக் கூடிய தேசிய மக்கள் சக்தி இன்று அது தொடர்பில் எதுவுமே பேசுவதில்லை.
இன்று பாரியளவில் அரசியல் பழிவாங்கல்கள் இடம்பெற்றுக் கொண்டிருக்கின்றன. கடந்த காலங்களில் சகல துறைகளிலும் அரசாங்கத்துக்கு எதிராக தொடர்ச்சியாக ஆர்ப்பாட்டங்களை முன்னெடுத்து வந்த ஜே.வி.பி. இன்று ஆர்ப்பாட்டக்காரர்கள் மீது தாக்குதல்களை நடத்தி அவர்களை விரட்டியடிக்கின்றது.
ஜனாதிபதித் தேர்தல் மற்றும் பொதுத் தேர்தலை இலக்காகக் கொண்டு அந்த சந்தர்ப்பத்தில் உயிர்த்த ஞாயிறு தாக்குதல்கள் தொடர்பில் ஜனாதிபதி அநுரகுமார திஸாநாயக்க கருத்துக்களை வெளியிட்டார்.
அதன் பின்னர் அது குறித்து எந்த கருத்துக்களும் வெளியிடப்படவில்லை. ஆனால் தற்போது மீண்டும் உள்ளுராட்சிமன்றத் தேர்தலை இலக்காகக் கொண்டு உயிர்த்த ஞாயிறு தாக்குதல்கள் தொடர்பில் பேச ஆரம்பித்திருக்கின்றார்.
ஏப்ரல் 21ஆம் திகதிக்கு முன்னர் உயிர்த்த ஞாயிறு தாக்குதல்களுடன் தொடர்புடையவர்களது பெயர்கள் வெளியிடப்படும் என ஜனாதிபதி தெரிவித்துள்ளார். ஆனால் நாம் அவற்றை நம்புவதற்கு தயாராக இல்லை. முடிந்தால் குற்றச்சாட்டுக்களின் அடிப்படையில் டிரான் அலஸை கைது செய்யுமாறு அரசாங்கத்துக்கு சவால் விடுக்கின்றேன்.
தேசிய மக்கள் சக்தி அரசாங்கம் கடந்த அரசாங்கத்தின் அனைத்து அரசியல்வாதிகளுடனும் ஒப்பந்த அரசியலிலேயே ஈடுபட்டு வருகிறது. அண்மையில் அமைச்சர் லால் காந்த முன்னாள் ஜனாதிபதி ரணில் விக்கிரமசிங்கவுக்கு சிறந்த சான்றிதழை வழங்கியமையிலிருந்தே இது தெளிவாகத் தெரிகிறது.
ஒருபுறம் லால் காந்த ரணிலுக்கு புகழாரம் சூட்ட, மறுபுறம் சிலர் பட்டலந்த ஆணைக்குழு அறிக்கையோ அழைக்கின்றனர். இவ்வாறு வெளிப்படையாக முரண்பாடுகளைக் கொண்ட கட்சியாக தேசிய மக்கள் சக்தி காணப்படுகிறது என்றார்.
