நடைபெற்று முடிந்த பாராளுமன்ற தேர்தலில் போட்டியிட்ட வேட்பாளர் பொன் சுதனின் தந்தையின் சிலை கும்பலொன்றால் உடைக்கப்பட்டுள்ளது.
கிளிநொச்சி இயக்கச்சி பகுதியில் அமைந்துள்ள இராவணன் வனப் பகுதியில் பொன் சுதனால் அவரது தந்தையின் சிலை நிறுவப்பட்டது. இந்த சிலையின் முகப்பகுதியை விசமிகள் சிலர் கடந்த வியாழக்கிழமை (21) உடைத்துள்ளனர்.
இதனையடுத்து, உடனடியாக கண்காணிப்பு கெமராவை ஆய்வு செய்தபோது சம்பவ தினத்தன்று சிசிரிவி கெமரா நிறுத்திவைக்கப்பட்டுள்ளதாக பொன் சுதன் தெரிவித்துள்ளார்.
தன் மீதான அரசியல் முரண்பாட்டால் இந்த சம்பவம் இடம்பெற்றிருக்கலாம் எனவும், திடீரென சிசிரிவி கெமரா நிறுத்தப்பட்டதையும் பொலிஸாரின் கவனத்துக்கு கொண்டு சென்றதாகவும் பொன் சுதன் மேலும் தெரிவித்தார்.
இச்சம்பவம் தொடர்பாக பளை பொலிஸ் நிலையத்தில் முறைப்பாடு பதிவு செய்யப்பட்டதையடுத்து, பளை பொலிஸார் மேலதிக விசாரணைகளில் ஈடுபட்டு வருகின்றனர்.
