கல்கிஸை – படோவிட்டவில் நேற்று (13) இரவு இடம்பெற்ற துப்பாக்கிச் சூட்டில் நபர் ஒருவர் உயிரிழந்துள்ளார்.
நேற்று இரவு 9.25 அளவில் மோட்டார் சைக்கிளில் வந்த இருவரே இந்த துப்பாக்கிச் சூட்டை மேற்கொண்டுள்ளதாக பொலிஸார் தெரிவித்தனர்.
துப்பாக்கிச் சூட்டில் காயமடைந்த நபர் சிகிச்சைக்காக களுபோவில வைத்தியசாலையில் அனுமதிக்கப்பட்டதன் பின்னர் உயிரிழந்துள்ளார்.
குறித்த துப்பாக்கிச்சூட்டில் உயிரிழந்தவரின் மார்பு மற்றும் கால் பகுதிகளில் காயங்கள் காணப்பட்டன.
படோவிட்ட 3ஆம் கட்டப் பகுதியைச் சேர்ந்த 30 வயதான கயாஷான் சத்துரங்க பெர்னாண்டோ என்பவரே உயிரிழந்துள்ளார்.
துப்பாக்கிச் சூட்டுக்கு டி-56 ரக துப்பாக்கி பயன்படுத்தப்பட்டிருக்கலாம் என பொலிஸார் சந்தேகிக்கின்றனர்.
இதேவேளை, இந்த துப்பாக்கிச் சூட்டுக்குப் பிறகு, துப்பாக்கிதாரிகள் இறந்தவரின் உறவினர் ஒருவரின் வீட்டிற்கும் சென்றனர், அவர்களால் அந்த வீட்டின் நுழைவாயிலை திறக்க முடியாததால், அங்கு துப்பாக்கி பிரயோகம் மேற்கொண்டுவிட்டு தப்பிச் சென்றுள்ளனர்.
இந்த சம்பவம் அங்கிருந்த CCTV கமராவில் பதிவாகியுள்ளது.
துப்பாக்கிதாரிகள் வந்த மோட்டார் சைக்கிள் கடந்த வருடம் மார்ச் மாதம் 31 ஆம் திகதி கடவத்த பிரதேசத்தில் நபர் ஒருவரிடமிருந்து திருடப்பட்டதாக விசாரணையில் இருந்து தெரியவந்துள்ளதாக பொலிஸார் தெரிவித்தனர்.
உயிரிழந்த நபர் போதைப்பொருள் கடத்தலில் ஈடுபட்டவர் என தெரியவந்துள்ளதுடன், மேலதிக விசாரணைகளை தெஹிவளை பொலிஸார் மேற்கொண்டு வருகின்றனர்
