பொரளை பொலிஸ் பிரிவுக்குட்பட்ட ரி – 20 தோட்டப் பகுதியில் ஹெரோயின், ஐஸ், போதை மாத்திரை , தோட்டாக்கள் மற்றும் வெளிநாட்டு துப்பாக்கியுடன் ஒருவர் நேற்று சனிக்கிழமை (09) கைது செய்யப்பட்டுள்ளார்.
கொழும்பு தெற்கு குற்றப் புலனாய்வுப் பிரிவின் அதிகாரிகளுக்குக் கிடைத்த தகவலின் அடிப்படையில் மேற்கொள்ளப்பட்ட சுற்றிவளைப்பின்போதே இந்த நபர் கைது செய்யப்பட்டுள்ளார்.
சந்தேக நபர் 23 வயதுடைய தெமட்டகொட பிரதேசத்தைச் சேர்ந்தவர் ஆவார்.
கைது செய்யப்பட்ட நபரிடமிருந்து 120 கிராம் 390 மில்லிகிராம் ஹெரோயின் போதைப்பொருள் பொலிஸாரால் கைப்பற்றப்பட்டுள்ளது.
இது தொடர்பாக மேலும் தெரியவருவதாவது:
சந்தேக நபரின் வாக்குமூலத்தின் அடிப்படையில், அவரது வீட்டில் மேற்கொள்ளப்பட்ட சோதனையின்போது, 30 கிராம் 650 மில்லிகிராம் ஐஸ் போதைப்பொருள், 5000 போதை மாத்திரைகள், வெளிநாட்டில் தயாரிக்கப்பட்ட துப்பாக்கி, 9 மில்லிமீற்றர் ரக 5 தோட்டாக்கள் மற்றும் ரிவோல்வருக்கு பயன்படுத்தப்படும் 2 தோட்டாக்கள் பொலிஸாரால் கைப்பற்றப்ட்டுள்ளன.
சந்தேக நபருடன் கைப்பற்றப்பட்ட பொருட்கள் பொரளை பொலிஸ் நிலையத்தில் ஒப்படைக்கப்பட்டுள்ளன.
இது தொடர்பான மேலதிக விசாரணைகளில் பொரளை பொலிஸார் ஈடுபட்டு வருகின்றனர்.
