ஸ்ரீலங்கா சுதந்திரக்கட்சியின் உறுப்பினர்கள் பாதயாத்திரையில் கலந்துகொள்ளக்கூடாது என ஜனாதிபதி உறுதியாக தெரிவித்துள்ளதாகவும், கட்சியை பிளவுபடுத்தவோ அல்லது நாட்டில் குழப்பத்தை ஏற்படுத்தவோ ஸ்ரீலங்கா சுதந்திரக்கட்சி உறுப்பினர்கள் செயற்படக்கூடாது என்பதே அவரின் நிலைப்பாடு எனவும்அமைச்சர் மஹிந்த சமரசிங்க தெரிவித்தார்.
ஐக்கிய தேசியக் கட்சியுடன் உறவை தொடர அடுத்த மூன்று ஆண்டுகாலத்திற்கான புரிந்துணர்வு ஒப்பந்தத்தை நீடிக்க வேண்டும். தேசிய அரசாங்கத்தை இரண்டு ஆண்டுகளுடன் கலைப்பது நாட்டின் நிலைமைகளை குழப்பும் செயலாகும். எனவே ஐந்து ஆண்டுகளுக்கான புரிந்துணர்வு ஒப்பந்தத்தை நீடிப்பது தொடர்பில் ஸ்ரீலங்கா சுதந்திரக்கட்சி ஆராயும் என என்றும் அமைச்சர் குறிப்பிட்டார்.
அரசாங்க தகவல் திணைக்களத்தில் நேற்று நடைபெற்ற செய்தியாளர் சந்திப்பில் கலந்துகொண்டிருந்தபோது ஐக்கிய தேசியக் கட்சியுடன் ஸ்ரீலங்கா சுதந்திரக்கட்சி புரிந்துணர்வு உடன்படிக்கைகளை நீட்டிக்குமா என வினவியபோதே அவர் மேற்கண்டவாறு குறிப்பிட்டார்.அவர் மேலும் குறிப்பிடுகையில்,
பொது எதிரணியினர் முன்னெடுக்கவுள்ளதாக கூறப்படும் பாதயாத்திரையை முன்னெடுப்பதற்கு ஜனாதிபதி பூரண அங்கீகாரத்தை வழங்கியுள்ளதாக நேற்று(நேற்று முன்தினம்) ஜனாதிபதியுடன் நடைபெற்ற பொது எதிரணியினரின் சந்திப்பின் பின்னர் பாராளுமன்ற உறுப்பினர் பிரசன்ன ரணதுங்க ஊடகங்களுக்கு தெரிவித்துள்ளார்.
ஆனால் இந்த கருத்து முற்றிலும் பொய்யான ஒரு கருத்தாகும். ஜனாதிபதியுடனான சந்திப்பின் போது ஸ்ரீலங்கா சுதந்திரக்கட்சியின் உறுப்பினர்கள் இந்த பாதயாத்திரையில் கலந்துகொள்ளக்கூடாது என உறுதியாக தெரிவித்துள்ளதாகவும், கட்சியை பிளவுபடுத்தவோ அல்லது நாட்டில் குழப்பத்தை ஏற்படுத்தவோ ஸ்ரீலங்கா சுதந்திரக்கட்சி உறுப்பினர்கள் செயற்படக்கூடாது எனவும் அமைச்சரைவை கூட்டத்துக்கு முன்னதாக குறிப்பிட்டார்.
தேசிய அரசாங்கத்திற்கு எதிராக இடம்பெறும் சதிகளை தன்னால் அனுமதிக்க முடியாது எனவும் ஜனாதிபதி கூறியுள்ளார். பொது எதிரணியின் பாதயாத்திரையில் ஸ்ரீலங்கா சுதந்திரக்கட்சியின் உறுப்பினர்கள் கலந்துகொள்ள ஜனாதிபதி அனுமதி வழங்கியுள்ளார் என இவர்கள் தெரிவிக்கின்றனர். ஆனால் ஜனாதிபதி எந்தவொரு சந்தர்ப்பத்திலும் அதற்கான அனுமதியை வழங்கவில்லை.
ஸ்ரீலங்கா சுதந்திரக்கட்சியின் உறுப்பினர்கள் எவரும் பொது எதிரணியின் பாதயாத்திரையில் கலந்துகொள்ள முடியாது. ஆனால் இன்று ஊடகங்களும், பொது எதிரணியினரும் ஸ்ரீலங்கா சுதந்திரக்கட்சியின் யார் கலந்துகொள்வார்கள் எனவும், அவர்களுக்கு எதிராக ஒழுக்காற்று நடவடிக்கை எடுக்கப்படுமா எனவும் கேள்வி எழுப்பி வருகின்றனர். ஆனால் பொது எதிரணியின் பாதயாத்திரை முதலில் நடைபெறுகின்றதா என்பதை பார்த்துவிட்டு அடுத்த கட்ட நடவடிக்கைகள் என்னவென பார்க்கலாம்.
ஸ்ரீலங்கா சுதந்திரக்கட்சிக்கு எதிராக இந்த செயற்பாடுகள் அமையாவிட்டாலும் நாம் ஐக்கிய தேசியக் கட்சியுடன் இணைந்து தேசிய அரசாங்கத்தை முன்னெடுத்து செல்கின்றோம். அவ்வாறு இருக்கையில் அரசாங்கத்தை குழப்புவது நாட்டில் தாக்கத்தை ஏற்படுத்தும் செயற்பாடாகும். அதேபோல் இப்போது நாம் இரண்டு ஆண்டுகளுக்கான புரிந்துணர்வு உடன்படிக்கையை மேற்கொண்டு அதன் அடிப்படையில் செயற்பட்டு வருகின்றோம்.
பிரதான இரண்டு கட்சிகளுக்கும் மக்கள் முழுமையான ஆதரவை வழங்காத நிலையில் இரண்டு கட்சிகளும் ஒன்றிணைந்து இந்த தேசிய அரசாங்கத்தை முன்னெடுத்துவருகின்றோம். ஆகவே புரிந்துணர்வு உடன்படிக்கை என்பது மிகவும் அவசியமான ஒன்றாகும். அவ்வாறு இருக்கையில் இப்போது தேசிய அரசாங்க ஆட்சியின் இரண்டு ஆண்டுக்காலம் நிறைவடையும் நிலையில் அடுத்த மூன்று ஆண்டுகாலத்திற்கான புரிந்துணர்வு ஒப்பந்தத்தை நீடித்து ஐந்து ஆண்டுகளுக்கான தேசிய அரசாங்கத்தை முன்னெடுக்க வேண்டும். தேசிய அரசாங்கமே இப்போது நாடு இருக்கும் நிலையில் நாட்டை முன்னெடுக்க சிறந்த தெரிவாக உள்ளது.
எவ்வாறு இருப்பினும் தேசிய அரசாங்கமாக அடுத்த மூன்று ஆண்டுகளுக்கு முன்னோக்கி செல்வதா அல்லது இரண்டு ஆண்டுகளின் பின்னர் தனித்து செல்வதா என்பது தொடர்பில் ஸ்ரீலங்கா சுதந்திரக்கட்சியின் மத்தியகுழு கூடி ஆராயும். எவ்வாறு இருப்பினும் நான்கு ஆண்டுகளுக்கு முன்னர் ஜனாதிபதி தேர்தலை நடத்த இயலாது. அதேபோல் பாரளுமன்றத்தை கலைக்கவும் முடியாது. அவ்வாறு இருக்கையில் தேசிய அரசாங்கமாக செயற்படுவதே ஒரே தீர்வாக உள்ளது. அது தொடர்பில் சிந்திக்கவேண்டும் எனவும் அவர் குறிப்பிட்டார்.
