வீதிகளில் வாகனங்களை செலுத்தும் சாரதிகள் வீதியெங்கும் கடமையில் ஈடுபடும் போக்குவரத்துப் பொலிஸாரின் பாதுகாப்பை கருத்திற்கொள்ளுமாறு பொலிஸ் ஊடக பேச்சாளர், சிரேஷ்ட பொலிஸ் அத்தியட்சகர் நிஹால் தல்துவ சாரதிகளிடம் வேண்டுகோள் விடுத்துள்ளார்.
அவர் கடந்த சனிக்கிழமை (7) கொழும்பில் இடம்பெற்ற ஊடகவியலாளர் சந்திப்பில் கலந்துகொண்டபோதே இவ்வாறு தெரிவித்துள்ளார்.
கொழும்பு சுதந்திர சதுக்கத்துக்கு அருகில் போக்குவரத்துக் கடமையில் ஈடுபட்டிருந்த பொலிஸ் அதிகாரி ஒருவர் வாகன விபத்து ஏற்பட்டு உயிரிழந்ததை சுட்டிக்காட்டியே நிஹால் தல்துவ வாகன சாரதிகளிடம் இவ்வாறு கேட்டுக்கொண்டார்.
இதன்போது அவர், இந்த ஆண்டு இதுவரை 1638 வாகன விபத்துக்கள் பதிவாகியுள்ளன எனவும், 1733 பேர் விபத்துக்களில் சிக்கி உயிரிழந்தனர் எனவும் தெரிவித்தார்.
