மயிலத்தமடு மாதவனை பண்ணையாளர்கள் எதிர்கொள்ளும் பிரச்சினைகள் தொடர்பில் அவர்களின் பிரதிநிதிகள் அடங்கிய குழுவினரை ஜனாதிபதி ரணில் விக்கிரமசிங்க இன்று ஞாயிற்றுக்கிழமை (8) சந்திக்கவுள்ளார்.
மட்டக்களப்புக்கு இரண்டு நாட்கள் விஜயம் மேற்கொண்டுள்ள ஜனாதிபதி ரணில் விக்கிரமசிங்க இன்றையதினம் செங்கலடி மத்திய கல்லூரியின் 149ஆவது ஆண்டு விழாவில் பங்கேற்கவுள்ளார்.
அதேநேரம், தமது மேய்ச்சல் தரைப் பிரச்சினைக்கு நியாயமானதும் நிரந்தமரமானதுமான தீர்வு வழங்குமாறு கோரி மயிலத்தமடு மாதவனை பண்ணையாளர்கள் சித்தாண்டியில் இன்றையதினத்துடன் 24ஆவது நாளாக தொடர் போராட்டத்தினை முன்னெடுத்து வருகின்றனர்.
இந்நிலையில், தமிழ் உணர்வாளர்கள் குழுவின் தலைவர் கணபதிப்பிள்ளை மோகனின் ஏற்பாட்டில் ஜனாதிபதி ரணில் விக்கிரமசிங்கவுக்கும், பண்ணையாளர்களுக்கும் இடையில் சந்திப்பு ஏற்பாடாகியுள்ளது.
அந்தவகையில், பண்ணையாளர்கள் சார்பில், பண்ணையாளர் சங்கத்தின் தலைவர் சீ.தியாகராசா செயலாளர் பா.பரசுராமன் கிழக்குப் பல்கலைக்கழகத்தின் முன்னாள் துணைவேந்தர் பேராசியர் த. ஜெயசிங்கம் அடங்கிய மூவர் கொண்ட குழுவினர் பங்கேற்கவுள்ளமை குறிப்பிடத்தக்கது.
