திருகோணமலை மூதூர் பொலிஸ் பிரிவுக்குட்பட்ட பட்டித்திடல் பகுதியில் காட்டு யானையின் தாக்குதலுக்குள்ளாகி வயோதிபர் ஒருவர் உயிரிழந்த சம்பவம் இன்று வியாழக்கிழமை (07) காலை இடம்பெற்றுள்ளது.
குறித்த சம்பவத்தில் அப்பகுதியைச் சேர்ந்த முருகுப்பிள்ளை ராசலிங்கம் (வயது 69) என்ற நபரே உயிரிழந்துள்ளதாக மூதூர் பொலிஸார் தெரிவிக்கின்றனர்.
இச்சம்பவம் தொடர்பாக தெரியவருவதாவது,
குறித்த நபர், வீட்டுக்கு அருகில் உள்ள காணியில் தோட்டச் செய்கையில் ஈடுபட்டுவரும் நிலையில் அப்பகுதியில் இன்று (07) அதிகாலை யானையின் நடமாட்டத்தை அவதானித்து வீட்டுக்கு வெளியே வந்து யானையை விரட்டியபோது யானையின் தாக்குதலுக்குள்ளாகி இறந்துள்ளதாக தெரியவருகிறது.
குறித்த தோட்டத்தையும் வீட்டையும் சுற்றி யானைவேலி அமைக்கப்பட்டிருந்தபோதும் யானை வேலியை சேதமாக்கி தோட்டத்தில் வைத்து குறித்த நபரை யானை தாக்கியுள்ளமை குறிப்பிடத்தக்கது. மேலதிக விசாரணைகளை மூதூர் பொலிஸார் மேற்கொண்டு வருகின்றனர்.
