தேசிய கடன் மறுசீரமைப்பு தொடர்பிலான விசேட பாராளுமன்ற அமர்வு சனிக்கிழமை (1) காலை 09.30 மணியளவில் சபாநாயகர் தலைமையில் ஆரம்பமாகவுள்ளது.
கடன் மறுசீரமைப்பு செயற்திட்ட யோசனை மீதான விவாதத்தை மாலை 07.30 மணி வரை நடத்தி அதை தொடர்ந்து வாக்கெடுப்பு நடத்த தீர்மானிக்கப்பட்டுள்ளது.
சபாநாயகர் தலைமையில் வெள்ளிக்கிழமை (30) இடம் பெற்ற கட்சித் தலைவர் கூட்டத்தின் போது இந்த தீர்மானம் எடுக்கப்பட்டுள்ளது. அத்துடன் எதிர்வரும் 05 ஆம் திகதி புதன்கிழமை வாராந்த பாராளுமன்ற கூட்டத்தொரை ஆரம்பிக்க தீர்மானிக்கப்பட்டுள்ளது.
தேசிய கடன் மறுசீரமைப்பு விவகாரத்தை இந்த வாரத்துக்குள் நிறைவு செய்ய அரசாங்கம் கொள்கை ரீதியில் தீர்மானித்தது.
இதற்கமைய பாராளுமன்றத்தை கூட்டுமாறு பிரதமர் முன்வைத்த கோரிக்கைக்கு அமைய பாராளுமன்ற நிலையியற் கட்டளையின் 16 ஆவது பிரிவுக்கு அமைய பாராளுமன்ற அமர்வை ஆரம்பிக்கும் விசேட வர்த்தமானி அறிவித்தலை சபாநாயகர் மஹிந்த யாப்பா அபேவர்தன கடந்த செவ்வாய்க்கிழமை மாலை வெளியிட்டார்.
இதற்கமைவாகவே விசேட பாராளுமன்ற அமர்வு இடம்பெறுகிறது.
விசேட பாராளுமன்ற அமர்வில் கலந்துகொள்ளுமாறு பாராளுமன்ற செயலாளர் நாயகம் சகல பாராளுமன்ற உறுப்பினர்களுக்கும் எழுத்துமூலமாக அறிவித்துள்ளார்.
தேசிய கடன் மறுசீரமைப்பு திட்டத்துக்குள் அரச மற்றும் தனியார் வங்கி கட்டமைப்பு உள்ளடக்கப்படமாட்டாது.
57 மில்லியன் வங்கி வைப்பாளர்களின் நிதி நிலைக்கும் பாதிப்பு ஏற்படாது.அத்துடன் ஊழியர் சேமலாப நிதியம் மற்றும் நம்பிக்கை நிதியம் என்பனவற்றின் கடன் மறுசீரமைக்கப்படும்.
ஊழியர் சேமலாப நிதியம்,ஊழியர் நிதியம் ஆகியவற்றுக்கு திறைசேரி வழங்கியுள்ள பிணைமுறிகள் அனைத்தும் ஸ்டெப் டவுன் முறையில் மீளப்பெறப்பட்டு புதிய பிணைமுறிகள் வழங்கப்படும்.
ஆகவே தேசிய கடன் மறுசீரமைப்பால் வங்கி கட்டமைப்புக்கும்,ஈ.பி.எப் மற்றும் ஈ.டி.எப் என்பனவற்றுக்கு பாதிப்பு ஏற்படாது என மத்திய வங்கியின் ஆளுநர் கலாநிதி நந்தலால் வீரசிங்க நாட்டு மக்களுக்கு உத்தரவாதம் வழங்கினார்.
தேசிய கடன் மறுசீரமைப்பு தொடர்பிலான தீர்மானத்துக்கு ஜனாதிபதி ரணில் விக்கிரமசிங்க தலைமையில் கடந்த புதன்கிழமை இடம்பெற்ற விசேட அமைச்சரவை கூட்டம் அனுமதி வழங்கியது.
தேசிய கடன் மறுசீரமைக்கப்படும் முறைமை தொடர்பில் மத்திய வங்கியின் ஆளுநர் நந்தலால் வீரசிங்க அமைச்சரவை அமைச்சர்களுக்கு தெளிவுப்படுத்தியுள்ளார்.
அத்துடன் தேசிய கடன் மறுசீரமைப்பு திட்ட வழிமுறைகள் தொடர்பில் உறுதியான தீர்மானம் எடுப்பதற்காக நேற்று முன்தினம்(30) வங்கி விடுமுறை வழங்கப்பட்டது.
