நானுஓயா பொலிஸ் பிரிவுக்குட்பட்ட நுவரெலியா – தலவாக்கலை பிரதான வீதியோரத்தில் பங்கலாவத்த பகுதியில் விவசாய நிலத்தில் பணி புரிந்த முதியவர் ஒருவர் விவசாய தோட்டத்திலிருந்து தவறி விழுந்து உயிரிழந்துள்ளதாக பொலிஸார் தெரிவித்தனர்.
இவ்வாறு உயிரிழந்த முதியவர் 70 வயதான நானுஓயா எடின்பரோ பிரதேசத்தைச் சேர்ந்த வேலுசாமி காளியம்மா ஆவார்.
குறித்த முதியவர் விவசாய தோட்டத்தில் தொழில் புரிந்துகொண்டிருந்தபோது மழையுடனான காலநிலை காரணமாக தோட்டத்தின் ஓரத்தில் இருந்து வழுக்கி விழுந்து தலையில் பலமாக அடிபட்டதன் காரணமாக சம்பவ இடத்திலேயே உயிரிழந்துள்ளதாக கூறப்படுகிறது.
உயிரிழந்தவரின் சடலம் நுவரெலியா மாவட்ட வைத்தியசாலையின் பிரேத அறையில் வைக்கப்பட்டுள்ளதோடு, பிரேத பரிசோதனைகளின் பின் சடலம் உறவினர்களிடம் ஒப்படைக்கப்படும் என பொலிஸார் மேலும் தெரிவித்தனர்.
இவ்விபத்து குறித்த மேலதிக விசாரணைகளை நானுஓயா பொலிஸார் மேற்கொண்டு வருகின்றனர்.
