இலங்கையின் வரலாற்றில் 2022 ஆம் ஆண்டு என்பது மிகக் கடினமான, சவால்மிக்க, பொருளாதார நெருக்கடியை சந்தித்த ஆண்டாக அமைந்தது. முக்கியமாக இலங்கை வங்குரோத்து நாடாக பிரகடனப்படுத்தப்பட்டது. பாரியதொரு பொருளாதார அதிர்ச்சியை கடந்த வருடம் இலங்கை எதிர்கொண்டது.
வரி குறைப்பினால் அரச வருமானம் குறைவடைந்தது, இதனால் பொருளாதார ரீதியான நெருக்கடிகள் ஏற்பட்டன. யூரியா உரத்தை தடை செய்தமையினால் விவசாய உற்பத்தியில் பாரிய வீழ்ச்சி ஏற்பட்டது. கடன் நெருக்கடி, சுற்றுலாத்துறை வருமானம் குறைவடைந்தமை, அந்நிய செலாவணி வருமானம் குறைவடைந்தமை போன்றன பொருளாதார கட்டமைப்பில் பாரதூரமான நெருக்கடிகளை ஏற்படுத்தின.
இறுதியில் அது அரசியல் கட்டமைப்பிலும் பிரச்சினையை தோற்றுவித்தது. அத்தியாவசிய பொருட்களுக்காக மக்கள் வரிசைகளில் நிற்க வேண்டிய ஒரு யுகம் கடந்த வருடம் ஏற்பட்டது. பணவீக்கம் 80 வீதத்தை தாண்டியது. உணவு பணவீக்கம் 90 வீதத்தை தாண்டியது. கடந்த வருடமே வங்கிகளின் வட்டி வீதங்களும் கடுமையாக அதிகரிக்கப்பட்டன. இதனால் சிறிய மற்றும் நடுத்தர வர்த்தகர்களும் பாதிக்கப்பட்டனர். எரிபொருள் பற்றாக்குறை காரணமாக மின்சார உற்பத்தி பாதிக்கப்பட்டது. மின்சார துண்டிப்பினால் நெருக்கடிகள் ஏற்பட்டன.
அதுமட்டுமின்றி மின்சார கட்டண அதிகரிப்பும் மக்களை கடுமையாக பாதித்தது. எரிபொருள் விலை அதிகரிப்பு மற்றும் டொலர் பெறுமதி உயர்வு காரணமாக மக்களின் வாழ்க்கைச் செலவு கடுமையாக உயர்வடைந்தது. போக்குவரத்து கட்டணம் உள்ளிட்ட சகல சேவைகளின் கட்டணங்களும் உயர்வடைந்தன. உணவுப் பொருள் உள்ளிட்ட சகல உற்பத்தி பொருட்களின் விலைகளும் அதிகரித்தன. இதனால் மக்கள் 2022ஆம் ஆண்டில் கடும் துன்பங்களை பொருளாதார ரீதியில் அனுபவிக்க வேண்டிய நிலை ஏற்பட்டது.
இந்த பின்னணியிலேயே 2022ஆம் ஆண்டுக்கான மத்திய வங்கியின் ஆண்டறிக்கை ஜனாதிபதியிடம் கையளிக்கப்பட்டுள்ளது. அந்த அறிக்கையின் சாரம்சம் தற்போது வெளியிடப்பட்டிருக்கின்றது. எப்போதும் இல்லாதவாறு 2022ஆம் ஆண்டு கடுமையான நெருக்கடிகள் ஏற்பட்டமையினால் மத்திய வங்கியின் ஆண்டறிக்கை எவ்வாறு இருக்கும் என்பது மக்களின் எதிர்பார்ப்பாக இருந்தது. அதனடிப்படையில் அதிர்ச்சிகரமான தகவல்களுடன் மத்திய வங்கியின் ஆண்டறிக்கை வெளியிடப்பட்டிருக்கின்றது. அதாவது மிக முக்கியமாக 2022ஆம் ஆண்டில் நாட்டின் பொருளாதாரமானது 7.8 வீதத்தினால் வீழ்ச்சியடைந்துள்ளதாக அறிவிக்கப்பட்டுள்ளது.
அதாவது இலங்கைப் பொருளாதாரமானது பொதுமக்களின் பதற்றம் மற்றும் அரசியல் கிளர்ச்சி இரண்டுக்கும் வழிவகுத்த கடுமையான பொருளாதார இன்னல்களைக் கொண்ட மிகக் கடினமான நிலைக்கு 2022இல் முகங்கொடுத்தது. எனினும் 2022இன் இறுதிப் பகுதியில் இருந்து பொருளாதாரத்தை மீட்டெடுப்பதற்காக முன்னெடுக்கப்பட்ட வேலைத் திட்டங்கள் தற்போது ஓரளவு மூச்சு விடுவதற்கான சூழலை நாட்டில் ஏற்படுத்தி இருக்கின்றன என்று மத்திய வங்கியின் ஆண்டறிக்கையில் குறிப்பிடப்பட்டிருக்கிறது.
எனினும், இவ்வாறான கடுமையான நெருக்கடிக்கு மத்தியில் மத்திய வங்கி முன்னெடுத்த வெளிப்படையான கொள்கை மற்றும் நடைமுறைகள் நெருக்கடி மேலும் மோசமடைவதை தடுத்ததாக மத்திய வங்கியின் ஆண்டறிக்கை கூறுகிறது.
2022ஆம் ஆண்டு நடுப்பகுதியில் பாரிய அளவில் உயர்வடைந்த பணவீக்கமானது தற்போது மீண்டும் குறைவடைந்து வருகின்றது. இதற்கு மத்திய வங்கி முன்னெடுத்த நாணய கொள்கைத் திட்டங்களே மிக முக்கிய காரணமாக அமைந்ததாக ஆண்டறிக்கையில் சுட்டிக்காட்டப்பட்டுள்ளது.
எப்படியிருப்பினும் கடந்த ஏழரை தசாப்தங்களாக பொருளாதாரத்தில் வேரூன்றியிருந்த இலங்கையின் இன்றைய இடையறாத தடங்கல்களைத் தீர்ப்பதற்கு இந்தச் சூழ்நிலையில் அரசாங்கம், மத்திய வங்கி மற்றும் ஏனைய அனைத்து ஆர்வலர்களும் இன்றியமையாத சீர்திருத்தங்களை நடைமுறைப்படுத்துவதற்கு ஆதரவினை வழங்குவது அவசியமாகும் என்றும் மத்திய வங்கி ஆண்டறிக்கை ஊடாக கோரிக்கை விடுத்துள்ளது.
இந்நிலையில் 7.8 வீதமாக பொருளாதார வீழ்ச்சி பதிவாகியுள்ளது. பொருளாதாரத்தில் ஏற்பட்ட தாக்கங்களினால் உற்பத்தியில் ஏற்பட்ட வீழ்ச்சி காரணமாகவே பொருளாதார வீழ்ச்சி பதிவாகியிருக்கிறது.
மேலும் கடந்த வருடம் ஏற்றுமதி ஊடாக இலங்கைக்கு 13 பில்லியன் டொலர்கள் கிடைத்தன. இறக்குமதி செலவாக 18.3 பில்லியன் டொலர்கள் பதிவாகி இருக்கின்றன. அத்துடன் அரச வருமானம் மொத்த தேசிய உற்பத்தியில் 8.3 வீதமாக பதிவாகியிருக்கிறது.
மேலும் இலங்கையில் 2022ஆம் ஆண்டில் தொழிற்படை 8.5 மில்லியன் ஆக காணப்பட்டது. அதில் தொழில் புரிவோர் எட்டு மில்லியன்களாக பதிவாகினர். 2022ஆம் ஆண்டில் வேலையின்மை வீதம் 4.7 ஆகவும் பதிவாகியதுடன் 2022ஆம் ஆண்டில் வெளிநாடுகளுக்கு தொழில் புரிவதற்காக மூன்று லட்சத்து 11 ஆயிரம் பேர் சென்றி ருக்கின்றனர்.
2022ஆம் ஆண்டில் எரிபொருட்களின் விலை 185 வீதத்தால் அதிகரித்திருக்கின்றன. பஸ் கட்டணங்கள் 140 வீதத்தால் அதிகரித்து இருக்கின்றன. ரயில் கட்டணம் 167 வீதத்தினால் அதிகரித்து இருக்கின்றது. தொடர்பாடல் சேவைகளின் கட்டணங்கள் 36 வீதத்தாலும் நீர் கட்டணம் 120 வீதத்தாலும் மின்சார கட்டணம் 114 வீதத்தினாலும் அதிகரித்து இருக்கின்றன. எரிவாயு விலை 68 வீதத்தால் அதிகரித்திருக்கின்றது. உணவு பொருட்களை எடுத்து நோக்கும் போது பாணின் விலை 166 வீதத்தினாலும் பருப்பின் விலை 57 வீதத்தினாலும் சீனியின் விலை 63 வீதத்தி னாலும் கோதுமை மாவின் விலை 106 வீதத்தினாலும் முட்டைகளின் விலை 105 வீதத்தினாலும் அதிகரித்து இருக்கின்றன. அரிசியின் விலை 69 வீதத்தினாலும் மரக்கறிகளின் விலை 18 வீதத்தினாலும் கோழி இறைச்சியின் விலை 64 வீதத்தினாலும் பழங்களின் விலைகள் 112 வீதத்தினாலும் அதிகரித்து இருக்கின்றன. அந்தவகையில் கடந்த வருடம் எந்தளவு தூரம் மக்கள் பொருளாதார நெருக்கடிகளினால் பாதிக்கப்பட்டிருக்கின்றனர் என்பதனையும் வாழ்க்கைச் செலவு எவ்வாறு உயர்வடைந்துள்ளது என்பதனையும் மத்திய வங்கியின் ஆண்டறிக்கை ஊடாக புரிந்துகொள்ள முடிகின்றது.
எனினும், கடந்த வருடத்தில் இவ்வாறு உணவு பொருட்களின், சேவைகளின், விலைகள், கட்டணங்கள் உயிர்வடைந்தாலும் கூட மக்களின் வருமானத்தில் அதிகளவு அதிகரிப்பு காணப்படவில்லை. அரச துறையில் இருக்கின்றவர்களின் கொள்வனவு வீதம் 20.6 வீதத்தினால் 2022ஆம் ஆண்டில் வீழ்ச்சியடைந்தது. அதேபோன்று தனியார் துறையில் பணியாற்றுகின்றவர்களின் கொள்வனவு வீதம் 22.7 வீதத்தினால் வீழ்ச்சியடைந்தது. முறை சாரா துறைகளில் இருக்கின்றவர்களின் கொள்வனவு வீதம் கடந்த வருடம் 17.5 வீதத்தினால் வீழ்ச்சி அடைந்தது. இதனூடாக மக்கள் எந்தளவு தூரம் தமது தேவைகளை 2022ஆம் ஆண்டில் குறைத்து கொண்டு இருக்கின்றனர் என்பது தெரிகின்றது.
அந்த வகையில் மிகவும் ஒரு நெருக்கடியான காலகட்டத்தை 2022ஆம் ஆண்டு இலங்கை கடந்து வந்திருக்கின்றது. தற்போது இலங்கையில் மறுசீரமைப்பு திட்டங்கள் முன்னெடுக்கப்பட்டு வருகின்றன. கடன் மறுசீரமைப்பு செயற்பாடுகள் முன்னெடுக்கப்படுகின்றன. 2022ஆம் ஆண்டு இலங்கை வங்குரோத்து நாடாக பிரகடனப்படுத்தப்பட்டது.
இந்நிலையில் 2022ஆம் ஆண்டு சர்வதேச நாணய நிதியத்தை இலங்கை நாடி கடன் உதவி பெற்றுக் கொள்வதற்கு நடவடிக்கை எடுத்தது. அது தொடர்பான பேச்சுவார்த்தைகள் முன்னெடுக்கப்பட்டு தற்போது 2.9 பில்லியன் டொலர் கடனுதவியை பெற்றுக்கொள்ள இணக்கப்பாடு எட்டப்பட்டுள்ளது. அது குறித்த உடன்படிக்கையும் கைச்சாத்திடப்பட்டிருக்கின்றது. 48 மாதங்களில் இந்தக் கடன் உதவி இலங்கைக்கு வழங்கப்படும். முதலாவது தவணைப்பணம் கிடைத்துள்ளது.
இந்நிலையில் இதற்கு சமாந்திரமாக நாட்டில் கடன் மறுசீரமைப்புகளும் பொருளாதார மறுசீரமைப்பு திட்டங்களும் முன்னெடுக்கப்படுகின்றன. சர்வ தேச மட்டத்திலும் இலங்கை கடன் மறுசீரமைப்பை செய்து கொள்ள வேண்டும். அதேபோன்று உள்நாட்டிலும் கடன் மறு சீரமைப்பு செய்துகொள்ளப்படலாம் என்று தெரிவிக்கப்படுகின்றது.
மத்திய வங்கியின் ஆண்டறிக்கையின் பிரகாரம் கடந்த வருடம் கடுமையான பொருளாதார நெருக்கடியை சந்தித்தபோதிலும் இவ்வருடத்தின் ஆரம்பத்திலிருந்து பொருளாதாரம் மீண்டு வருவதற்கான ஒரு சமிக்ஞை வெளிக்காட்டப்பட்டிருக்கின்றது. அதனடிப்படையில் இந்த மறுசீரமைப்புக்கள் மற்றும் கடன் மறுசீரமைப்புக்கள் மிக முக்கியமாக இருக்கின்றன. அதற்கு சகலரும் ஒத்துழைப்பு வழங்க வேண்டும் என்பதே மத்திய வங்கியின் ஆண்டறிக்கையின் முக்கிய சாராம்சமாக இருக்கின்றது. இந்நிலையில் விரிவான ஆண்டறிக்கையில் உள்விடயங்கள் மற்றும் ஏனைய விடயங்கள் எவ்வாறு இருக்கின்றன என்பதை ஆராயலாம். அதேபோன்று அடுத்துவரும் காலப்பகுதியில் எவ்வாறான இலக்குகள் முன்வைக்கப்பட்டுள்ளன என்பதையும் அறிந்து கொள்ள முடியும்.
ரொபட் அன்டனி
