உள்நாட்டில் தயாரிக்கப்பட்ட துப்பாக்கிகளை மறைத்து வைத்த இரு வேறு சம்பவங்களில் 30 மற்றும் 26 வயதுடைய இரண்டு பேர் கைது செய்யப்பட்டுள்ளதாக பொலிஸ் ஊடகப் பிரிவு குறிப்பிட்டுள்ளது.
கடந்த 31 ஆம் திகதியன்று மாலை வேளையில் கோமரன்கடவல பொலிஸ் பிரிவுக்குட்பட்ட ஒட்டிச்சன்குளம் மற்றும் புளியங்குளம் பொலிஸ் பிரிவுக்குட்பட்ட பரசன்குளம் பகுதிகளில் பொலிஸார் மேற்கொண்ட சோதனையின்போதே சந்தேக நபர்களிடமிருந்து உள்நாட்டில் தயாரிக்கப்பட்ட துப்பாக்கிகள் கைப்பற்றப்பட்டுள்ளன.
கோமரன்கடவல பொலிஸாரால் கைது செய்யப்பட்டவர் ஒட்டிச்சன் குளத்தை சேர்ந்த 30 வயதுடையவர் என்றும் , புளியங்குளம் பொலிஸாரால் கைது செய்யப்பட்டவர் பரசன்குளம் பகுதியைச் சேர்ந்த 26 வயதுடையவர் என்றும் பொலிஸார் தெரிவிக்கின்றனர்.
சந்தேக நபர்கள் இருவரையும் நீதிமன்ற விசாரணைக்காக முறையே திருகோணமலை வவுனியா மஜிஸ்திரேட் நீதிமன்றிலும், வவுனியா மஜிஸ்திரேட் நீதிமன்றிலும் சனிக்கிழமை (01) ஆஜர்படுத்தப்பட்டிருந்தனர்.
