வெடுக்குநாறி ஆதிசிவன் ஆலயத்திலுள்ள விக்கிரகங்களை உடைத்துள்ளமை கண்டனத்துக்குரியது.
இந்த தகாத செயற்பாடுகள் உடனடியாக நிறுத்தப்பட வேண்டும். மீண்டும் ஆலயம் உரிய இடத்தில் பராமரிக்கப்பட வேண்டும் என அகில இலங்கை இந்து மாமன்றத்தின் உப தலைவர் கலாநிதி ஆறுதிருமுருகன் கோரிக்கை விடுத்துள்ளார்.
இது தொடர்பில் அவர் மேலும் கருத்து தெரிவிக்கையில்,
சைவ மக்களின் தொன்மைகளை அழிக்கும் செயற்பாடு தொடர்கிறது. இது திட்டமிட்டு நடைபெறுகிறது. அரசாங்கம் இத்தகைய செயல்களை நிறுத்த வேண்டும்.
ஆதி சைவ கோவில்களை சைவ மக்கள் பராமரிப்பதற்கு தொல்லியல் திணைக்களம் தொடர்ந்து இடையூறு செய்வதும் வேதனைக்குரியது.
விக்கிரகங்களை உடைத்தமை தொடர்பில் ஜனாதிபதி உடன் நடவடிக்கை எடுக்க வேண்டும். ஆலய திருப்பணியை நடாத்த இந்து கலாசார திணைக்களம் உரிய அனுமதியினை வழங்க வேண்டும்.
தமிழ் பாராளுமன்ற உறுப்பினர்கள் இதற்கு உடனடியாக நடவடிக்கை எடுக்க வேண்டும். தொடர்ந்து சைவ சமயத்துக்கு வரும் இன்னல்களை போக்குவதற்கு அனைவரும் ஒத்துழைக்க வேண்டும் என்றார்.
