இலங்கையில் சொந்த வாகனங்களை வைத்திருப்பவர்கள் அதனை பாராமரிக்க முடியாத நிலைக்கு தள்ளப்பட்டுள்ளதாக தெரிவிக்கப்பட்டுள்ளது.
பழுதுபார்ப்பு மற்றும் சேவைகளுக்கு பணம் இல்லாததால், கார்கள், மோட்டார் சைக்கிள்கள் உள்ளிட்ட பத்து லட்சத்திற்கும் அதிகமான வாகனங்கள் நாடு முழுவதும் இயங்க முடியாத நிலை ஏற்பட்டுள்ளதாக வாகன பழுதுபார்ப்பு துறை தொடர்பான வட்டாரங்கள் தெரிவித்தன.
இவற்றில் ஏறக்குறைய பாதி வாகனங்கள் முறையான சேவை விநியோகம் இல்லாத காரணத்தால் முற்றிலும் செயலிழந்துள்ளதாக தெரிவிக்கப்படுகிறது.
வாகன உதிரிபாகங்களின் விலை இருமடங்காக உயர்ந்துள்ளதால், பல வாகனங்களில் உதிரி பாகங்களின் பயன்பாடு வெகுவாக குறைந்துள்ளதாகவும், இதனால் வாகனங்களின் பாவனைக்காலம் வெகுவாக குறைந்துள்ளதாகவும் வாகன சேவை வழங்குநர்கள் தெரிவிக்கின்றனர்.
மேலும் பல வாகனங்களின் சேவை வழங்கல் நேரம் தாண்டிய போதிலும் வாகனங்களை சேவைக்கு அனுப்புவதில் தாமதம் ஏற்படுவதாகவும் குறிப்பிடுகின்றனர்.
இந்த நிலைமையை கருத்திற்கொண்டு வாகனங்களுக்கான சேவைகளை இலகுபடுத்தும் வேலைத்திட்டத்தை நடைமுறைப்படுத்துமாறு அரசாங்கத்திடம் கோரிக்கை விடுப்பதாகவும், இதற்காக லங்காம டிப்போவை பயன்படுத்திக்கொள்ள முடியும் எனவும் வாகன உரிமையாளர்கள் தெரிவிக்கின்றனர்.இது லங்காமாவுக்கு கூடுதல் வருமானத்தை ஈட்டுவதற்கான வழி என்றும் அவர்கள் மேலும் சுட்டிக்காட்டுகின்றனர். இதற்கிடையில், கொரோனா காரணமாக நாடு மூடப்பட்டிருந்த காலகட்டத்தில், சரியான சேவை மற்றும் பராமரிப்பு இல்லாததால் ஏராளமான வாகனங்கள் ஓட்டுவதற்கு தகுதியற்றதாக மாறியதாக புதிய வாகனங்களின் பிரதிநிதிகள் தெரிவிக்கின்றனர்.
