கஜமுத்துக்களை விற்க முயன்ற இளைஞன் கல்முனையில் கைது

யானை கஜமுத்துக்களை இரகசியமாக விற்பனை செய்ய முயன்ற இளைஞனை திருக்கோவில் விசேட அதிரடிப்படையினர் கைதுசெய்துள்ளனர்.

அம்பாறை, கல்முனை புறநகர் பகுதியில் அமைந்துள்ள விருந்தினர் விடுதியொன்றில் கடந்த வெள்ளிக்கிழமை (3) இரவு சந்தேகத்துக்கிடமாக ஒருவர் நடமாடுவதாக இராணுவ புலனாய்வு பிரிவினருக்கு கிடைக்கப்பெற்ற தகவலையடுத்து திருக்கோவில் விசேட அதிரடிப்படையினர் குறித்த இளைஞனை கைதுசெய்தனர்.

இதன்போது கைதான சந்தேக நபரிடமிருந்து யானை தந்தத்துக்குள் இருக்கின்ற கஜமுத்துக்கள் நான்கினை விசேட அதிரடிப்படையினரால் மீட்கப்பட்டுள்ளது.

கஜமுத்துக்களை வைத்திருந்த காரணத்தினால்  கைதுசெய்யப்பட்ட இவ்வி‍ளைஞன் திருகோணமலை கந்தளாய் பகுதியை சேர்ந்த 29 வயதுடையவர் என தெரியவந்துள்ளது.

மேலும், கைதுசெய்யப்பட்ட நபர் உள்ளடங்கலாக சான்று பொருட்கள் யாவும் சம்மாந்துறை பகுதியிலுள்ள ஜீவராசிகள் திணைக்கள பிரிவிடம் மேலதிக விசாரணைக்காக ஒப்படைக்கப்பட்டுள்ளமை குறிப்பிடத்தக்கது.