பயங்கரவாத தடைச் சட்டத்தை விட மோசமானது புனர்வாழ்வு சட்டம். எனவே, இந்த நாட்டிலே நாட்டு மக்களின் எதிர்காலத்தை அழித்த கோத்தபாய ராஜபக்ஷ, தேசிய பொருளாதாரத்தை முழுமையாக அழித்த மகிந்த ராஜபக்ஷ, அவரின் சகோதரர் – நிதி அமைச்சராக இருந்த பசில் ராஜபக்ஷ மற்றும் அவர்களுடன் சேர்ந்து நாட்டின் பொருளாதாரத்தை அழித்த அஜித் கப்பிரால் ஆகியோர் புனர்வாழ்வு அளிக்கப்பட வேண்டியவர்கள் என பாராளுமன்ற உறுப்பினர் இரா.சாணக்கியன் தெரிவித்தார்.
பயங்கரவாத தடைச் சட்டத்தின்கீழ் கைது செய்யப்பட்ட வசந்த முதலிகே மற்றும் தமிந்த தேரர் ஆகியோரை விடுதலை செய்யக்கோரி சனிக்கிழமை (ஒக் 8) இடம்பெற்ற ஆர்ப்பாட்ட பேரணியில் கலந்துகொண்டு உரையாற்றியபோதே அவர் இவ்வாறு தெரிவித்தார்.
இந்த போராட்டத்தினை அனைத்து பல்கலைக்கழக மாணவர் ஒன்றியம், தொழிற்சங்க மக்கள் ஒன்றியம், பொது அமைப்புக்கள் மற்றும் அரசியல் கட்சிகள் இணைந்து முன்னெடுத்துள்ளன.
ஆர்ப்பாட்டத்தின்போது அவர் மேலும் கூறுகையில்,
இந்த பயங்கரவாத தடுப்புச் சட்டம், தமிழ் பேசும் மக்களை கடந்த 40 வருடங்களாக அடக்கிய சட்டமாகும்.
2019ஆம் ஆண்டுக்கு பின்னர் தமிழ் பேசும் இஸ்லாமிய சகோதரர்களை இந்த தடைச் சட்டத்தில் கைதுசெய்தனர்.
2022ஆம் ஆண்டு விசேடமாக நீண்ட காலத்துக்கு பின்னர் பெரும்பான்மை இனத்தைச் சேர்ந்த சிங்கள சகோதரர்களை இந்த பயங்கரவாத தடைச்சட்டத்தில் கைது செய்தனர்.
தமிழ் பேசும் மக்கள் இது ஒரு மோசமான சட்டம்; இதனை நீக்கவேண்டும்; இந்த சட்டத்தின் ஊடாக எங்கள் மக்களுக்கு அநீதி நடக்கின்றது என தெரிவித்தபோது ஒரு சிலர் பார்வையாளர்களாக இருந்தாலும் கூட, இன்று இந்த சட்டம் பெரும்பான்மை சமூகத்துக்கு எதிராக பயன்படுத்தப்படும்போது அவர்களுடன் இணைந்து இந்த சட்டத்தை முழுமையாக நீக்கவேண்டும் என போராடுகின்றோம்.
கடந்த 25 நாட்களாக இந்த சட்டத்தை முழுமையாக நீக்கக் கோரி காங்கேசன்துறையில் இருந்து அம்பாந்தோட்டை வரைக்கும் கையெழுத்துப் போராட்டத்தை செய்திருந்தோம். அந்த கையெழுத்துப் போராட்டத்தில் கூட நாங்கள் பெரும்பான்மைச் சமூக சகோதரர்களை இணைத்துக்கொண்டு போராட்டத்தை முன்னெடுத்திருந்தோம்.
இந்த சட்டத்தின்கீழ் கைது செய்யப்பட்ட பல்கலைக்கழக மாணவர் ஒன்றியத்தின் தலைவர் வசந்த முதலிகே, தேரர் போன்றோரை உடன் விடுதலை செய்யவேண்டும் என கோருகின்றோம்.
ஆனால், அதனுடன் சேர்த்து இதே சட்டத்தில் கைது செய்து நீண்ட காலமாக சிறையில் இருக்கும் அரசியல் கைதிகளை விடுவிக்கவேண்டும்.
இன்று மேடையிலே, 50 நாட்களாக சிறையில் இருக்கின்றனர் என பேசும் இவர்கள், எங்களுடைய உறவுகள் இந்த சட்டத்தில் கைதுசெய்யப்பட்டு 5 ஆயிரம் நாட்களாக சிறையில் இருப்பதை ஞாபகப்படுத்துகின்றோம்.
இவ்வாறு சில விடயங்களில் இரு சமூகங்களுக்குள் கருத்து முரண்பாடு இருந்தாலும், இந்த சட்டத்தை நீக்கும் கோரிக்கையில் இன்று ஒன்றாக இணைந்திருக்கின்றோம்.
இந்த பயங்கரவாத தடுப்புச் சட்டத்தை நீக்க கோரியுள்ள நிலையில் அரசாங்கம் புதிய சட்டங்களை இயற்றி, அந்த சட்டத்தை விட மோசமான சட்டத்தை கொண்டுவந்து, மக்களை அடக்குவதற்கும் முடக்குவதற்கும் சில முயற்சிகளை செய்துவருகின்றது.
அவ்வாறான ஒரு சட்டம்தான் புனர்வாழ்வு சட்டம். பயங்கரவாத தடுப்புச் சட்டத்திலாவது சிறையில் வைத்திருக்க சில உத்தரவு எடுக்கவேண்டும். ஆனால், புனர்வாழ்வுச் சட்டம் கொண்டுவந்தால் எவரையும் விரும்பிய காலப்பகுதியில், தாங்கள் நினைக்கும் வரைக்கும் வைத்திருந்து சித்திரவதை செய்யலாம். இது, புனர்வாழ்வு என்ற பெயரில் அவர்களை வதைக்கக்கூடிய சட்டமாக இருக்கும்.
இந்த நாட்டிலே புனர்வாழ்வு அளிக்கப்பட வேண்டியவர்கள் யார் என பார்த்தால், நாட்டு மக்களின் எதிர்காலத்தை அழித்த கோத்தாபய ராஜபக்ஷ, தேசிய பொருளாதாரத்தை முழுமையாக அழித்த மகிந்த ராஜபக்ஷ, அவரின் சகோதரர் நிதி அமைச்சராக இருந்த பசில் ராஜபக்ஷ மற்றும் அவர்களுடன் சேர்ந்து நாட்டின் பொருளாதாரத்தை அழித்த அஜித் கப்பிரால் ஆகியோரே ஆவர்.
எனவே, இந்த சட்டம் முழுமையாக நீக்கும் வரைக்கும் எமது போராட்டங்களின் வடிவம் மாறினாலும், போராட்டம் தொடரும் என்றார்.
