தமிழர்களின் கோரிக்கையை முன்னிறுத்தி முன் பிரச்சாரம் செய்யாமல் ஜெனிவா செல்வது, நோய்வாய்ப்பட்ட ஒருவரைப் புறக்கணித்து, அவரது இறுதிச் சடங்கிற்குச் செல்வதைப் போன்றது என வவுனியா காணாமல் ஆக்கப்பட்டோர் உறவுகளின் சங்கத்தினர் தெரிவித்துள்ளனர்.
வவுனியாவில் சுழற்சி முறையில் உணவு தவிர்ப்பு போராட்டத்தில் ஈடுபட்டுவரும் கொட்டகையில் 10 ஆம் திகதி ஞாயிற்றுக்கிழமை ஊடகங்களுக்கு கருத்து தெரிவிக்கையிலே இவ்வாறு தெரிவித்துள்ளனர்.
மேலும் தெரிவிக்கையில்..
காணாமல் ஆக்கப்பட்ட எமது பிள்ளைகளை கண்டறியவும் தமிழ் இறையாண்மையையும் பெறவும் அமெரிக்கா மற்றும் ஐரோப்பிய ஒன்றியம் உதவிக்காக காத்திருக்கும் இந்த குடிசையில் எமது தொடர் போராட்டம் இன்று 2029 நாளாகும்.
எதிர்வரும் திங்கட்கிழமை 12 ஆம் திகதி, யுன்ச்சிஆர்யின் மனித உரிமைகள் பேரவையின் 51வது அமர்வு ஆரம்பமாகும்.
நமது தேர்ந்தெடுக்கப்பட்ட தலைவர்கள் ஆகஸ்ட் மாதத்திற்கு முன்பு அமெரிக்கா, இங்கிலாந்து மற்றும் நெதர்லான்ட் ஆகிய நாடுகளுடன் தமிழர்கள் சார்பாக பிரச்சாரம் செய்யத் தவறிவிட்டனர்.
யுன்ச்சிஆர் தொடர்பான பெரும்பாலான முடிவுகள் உறுப்பு நாடுகளின் தலைநகரில் எடுக்கப்படுகின்றன, ஜெனீவாவில் அல்ல. எங்களின் தேர்ந்தெடுக்கப்பட்ட தலைவர்கள் அமெரிக்கா, இங்கிலாந்து அல்லது நெதர்லாந்துக்கு சென்றதில்லை. அவர்கள் தமிழர்களுக்கான சேவையை செய்ய தவறவிட்டார்கள்.
தமிழர்களின் கோரிக்கையை முன்னிறுத்தி முன் பிரச்சாரம் செய்யாமல் ஜெனிவா செல்வது, நோய்வாய்ப்பட்ட ஒருவரைப் புறக்கணித்து, அவரது இறுதிச் சடங்கிற்குச் செல்வதைப் போன்றதாகும்.
சிறீலங்காவின் போர்க்குற்றவாளிகளுக்கு தண்டனை, போர் குற்றவாளிகளுக்கு எதிரான பொருளாதார மற்றும் பயணத் தடைகள், சாட்சியங்கள் சேகரிக்கும் பொறிமுறையை விரிவுபடுத்துதல் போன்றவற்றைக் கோரும் அம்மையார் மிஷேலின் அறிக்கையை இப்போது நாம் அறிவோம்.
இலங்கையை ஐசிசிக்கு அழைத்துச் செல்வது அமெரிக்கா மற்றும் ஐரோப்பிய ஒன்றியத்தால் தீர்மானிக்கப்படும். அவர்கள் சரியான நேரத்துக்காகக் காத்திருக்கிறார்கள் என்பது எங்களுக்குத் தெரியும். ஐசிசி தோல்வியுற்றால், தமிழர்கள் மீதான இனப்படுகொலை குறித்து அமெரிக்காவும், ஐரோப்பிய ஒன்றியமும் ஒருதலைப்பட்சமாக முடிவெடுக்கும்.
எனவே, ஜெனிவா செல்லும் தமிழர்களிடம், பின்வருவனவற்றைக் கேட்க வேண்டாம் என்று கேட்டுக்கொள்கிறோம்.
13வது திருத்தம் பற்றி பேச வேண்டாம்
இலங்கை நீதிமன்ற அமைப்பை ஆதரிக்க வேண்டாம்
இலங்கையின் ஒற்றையாட்சி முறையின் அங்கமான சமஷ்ட்டியை முறையைக் கேட்காதீர்கள்.
ஒரு நாட்டுக்குள் இரு நாடு என்று கேட்காதீர்கள். அப்படி ஒன்றும் இல்லை, அது ஒரு போலி தத்துவம் என தெரிவித்தனர்.
