அமெரிக்காவின் நியூ யோர்க் மாநிலத்தில் போலியான கொவிட் 19 தடுப்பூசி அட்டைகளை விற்பனை செய்த குற்றச்சாட்டில் தாதியர்கள் இருவர் கைது செய்யப்பட்டுள்ளதுடன், பெரும் எண்ணிக்கையான ஆசிரியர்கள் பலர் இத்தடுப்பூசி அட்டைகளை அதிகாரிகளிடம் சமர்ப்பித்ததாக குற்றம் சுமத்தப்பட்டுள்ளனர்.
தாதிகளான ஜூலி டெவுவோனா (49), மரிசா உராரோ ஆகியோர் போலி தடுப்பூசி அட்டை விற்பனை மூலம் 15 லட்சம் டொலர்களுக்கு அதிகமான பணத்தை பெற்றுள்ளதாக குற்றம்சுமத்தப்பட்டுள்ளது. இத்தாதிகள் அடங்கிய குழுவொன்று சிறுவர்களுக்கு போலி தடுப்பூசி அட்டை வழங்குவதற்காக தலா 85 டொலர்களையும் வளர்ந்தவர்களிடமிருந்து தலா 220 டொலர்களை வசூலித்ததாகவும் அதிகாரிகள் தெரிவித்துள்ளனர்.
இத்தாதியர்களை நியூயோர்க் பொலிஸார் கைது செய்ததுடன், ஜூலி டெவுவோனாவின் வீட்டிலிருந்து 9 லட்சம் டொலர் பணத்தையும் கைப்பற்றியிருந்தமை குறிப்பிடத்தக்கது. இதேவேளை, தாம் கொவிட் -19 தடுப்பூசி செலுத்திக்கொண்டதாக போலியான சான்றிதழ்களை அதிகாரிகளிடம் சமர்ப்பித்ததாக சந்தேகிக்கப்படும் 82 ஆசிரியர்களை விசாரணை முடியும் வரை மீண்டும் பணியில் இணைத்துக்கொள்வதற்கு நியூயோர்க் கல்வித் திணைக்களம் இணக்கம் தெரிவித்துள்ளது.
கொவிட்19 தடுப்பூசி செலுத்திக்கொள்ளாத ஊழியர்கள் பணியிலிருந்து நீக்கப்படுவர் என நியூயோர்க் கல்வித் திணைக்களம் தெரிவித்திருந்தது. சுமார் 1000 பேர் இவ்வாறு பணி நீக்கம் செய்யப்பட்டனர்.
மேற்படி தாதியர்களின் போலி தடுப்பூசி அட்டை விவகாரத்தில் பெயர்கள் தொடர்புபடுத்தப்பட்ட 82 ஆசிரியர்கள் கடந்த ஏப்ரல் இறுதியில் சம்பளமற்ற விடுமுறையில் அனுப்பப்பட்டனர். இவர்களை, தொடர்ந்தும் இடைநிறுத்தி வைப்பதற்கான மனுவொன்றை நியூயோர்க் கல்வித் திணைக்களம் தாக்கல் செய்தது. எனினும், ஆசிரியர்கள் மீதான குற்றச்சாட்டு நிரூபிக்கப்படாத நிலையில் தொடர்ந்தும் அவர்களை விலக்கி வைப்பதுபொருத்தமல்ல என ஆசிரியர்களின் தொழிற்சங்கம் வாதாடியது.
இந்நிலையில், விசாரணைகள் முடிவடையும் வரை அவர்களை மீண்டும் சேவையில் இணைத்துக்கொள்வதற்கு நியூ யோர்க் கல்வித் திணைக்களம் இணக்கம் தெரிவித்துள்ளது.
