சென்னையில் கடந்த ஜூன் மாதத்தில் சில நாட்கள் மாலை நேரத்தில் பலத்த மழை பெய்தது. அதன் பிறகு கடந்த சில நாட்களாக மாலை நேரத்தில் மேகமூட்டத்துடன் காணப்பட்ட நிலையில் கடந்த 11 மற்றும் 12-ந்தேதிகளில் மாலை நேரத்தில் பலத்த காற்றுடன் மழை கொட்டியது.
அதன் பிறகு கடந்த 2 நாட்களாக மாலையில் மேகமூட்டம் காணப்படுகிறது. இந்த நிலையில் நாளை (16-ந்தேதி) முதல் சென்னையில் மாலை நேரத்தில் மழைக்கு வாய்ப்பு உள்ளது. இது தொடர்பாக வானிலை ஆய்வு மையம் கூறி இருப்பதாவது:-
இந்த வார இறுதியில் சென்னை மற்றும் புறநகர் பகுதிகளில் மாலை நேரத்தில் இடியுடன் கூடிய மழை பெய்ய வாய்ப்பு உள்ளது. நாளை (சனிக்கிழமை) முதல் சென்னையின் வடமேற்கு பகுதிகளில் மாலையில் இடியுடன் கூடிய மழை பெய்யும். மலைகளின் திசையில் இருந்து காற்று வருவதால் வடமேற்கு பகுதியில் மழை பெய்ய வாய்ப்புள்ளது.
வரும் நாட்களில் 50 மி.மீ. வரை மழை பெய்யலாம். இந்த மழை சில நாட்களுக்கு தொடரலாம். நேற்று கடலோர பகுதியில் லேசான மழை பெய்தது. அடுத்த 48 மணி நேரத்துக்கு சென்னை மற்றும் புறநகர் பகுதிகள் மேகமூட்டத்துடன் காணப்படும். மேலும் தமிழகத்தின் உள் மாவட்டங்களிலும் இடியுடன் கூடிய மழை பெய்ய வாய்ப்பு உள்ளது. இன்று முதல் பருவக்காற்றின் வேகம் குறையும். காற்று வீசுவது மேற்கு திசையில் இருந்து வடமேற்கு திசைக்கு மாறும். கடற்காற்று தாமதமாக வீசுவதால் பகல் நேரத்தில் வெப்பநிலை உயரும். இவ்வாறு அதில் கூறப்பட்டுள்ளது.
