தலைமன்னார் பொலிஸ் பிரிவுக்குட்பட்ட நடுக்குடா காட்டுப் பகுதியில் மறைத்து வைக்கப்பட்டிருந்த ஒரு தொகுதி மாத்திரைகளை இராணுவத்தினர் இன்று அதிகாலை மீட்டுள்ளனர்.
மன்னார் இராணுவ புலனாய்வாளர்களுக்கு கிடைக்கப் பெற்ற இரகசிய தகவலின் அடிப்படையில், நடுக்குடா இராணுவத்தினரின் உதவியுடன் இன்று அதிகாலை நடுக்குடா காட்டுப்பகுதியில் சோதனை நடவடிக்கை மேற்கொள்ளப்பட்டுள்ளது.
இதன்போது மறைத்து வைக்கப்பட்டிருந்த நிலையில் இரண்டு பெட்டிகள் கண்டுபிடிக்கப்பட்டு சோதனைக்கு உட்படுத்தப்பட்டபோது ஒரு தொகுதி மாத்திரைகள் மீட்கப்பட்டுள்ளன.
சோதனையின்போது கண்டுபிடிக்கப்பட்ட மாத்திரைகள் உடல் வலியை குறைப்பதற்கு பயன்படுத்தப்படுபவை என தெரியவந்துள்ளதோடு, சோதனை செய்த இரு பெட்டிகளில் இருந்து 60000 மாத்திரைகள் மீட்கப்பட்டுள்ளன.
குறித்த மாத்திரைகள் இந்தியாவில் இருந்து கடல் மார்க்கமாக கொண்டு வரப்பட்டிருக்கலாம் என்ற சந்தேகத்தின் அடிப்படையில் விசாரணை மேற்கொள்ளப்பட்டுள்ளதுடன், சந்தேகநபர்கள் எவரும் கைது செய்யப்படவில்லை என இராணுவத்தினர் தெரிவித்துள்ளனர்.
மீட்கப்பட்ட மாத்திரைகள் மேலதிக நடவடிக்கைகளுக்காக தலைமன்னார் பொலிஸாரிடம் ஒப்படைக்கப்பட்டுள்ளதுடன், இது தொடர்பான மேலதிக விசாரணைகள் முன்னெடுக்கப்பட்டு வருகின்றன.
