அமெரிக்க விமான நிலையத்தில் 5 பேரை சுட்டுக்கொன்ற முன்னாள் ராணுவ வீரரிடம் தீவிர விசாரணை நடத்தப்படுகிறது.
அமெரிக்காவில் புளோரிடா மாகாணத்தில் உள்ளது, போர்ட் லாடர்டேல் விமான நிலையம்.
அந்த விமான நிலையத்தின் 2வது முனையத்தில் பயணிகள் தங்களது உடைமைகளை பெற்றுக்கொள்கிற இடத்தில் நேற்று முன்தினம் ‘ஸ்டார் வார்ஸ் மேல் சட்டை’ அணிந்த வாலிபர் ஒருவர் புகுந்து, தன் கைத்துப்பாக்கியால் அங்கிருந்தவர்கள் மீது சரமாரியாக சுட்டார்.
இதனால் பயணிகள் பதற்றம் அடைந்தனர். அனைவரும் ஓலமிட்டவாறு நாலாபுறமும் ஓட்டம் பிடித்தனர். பலர் ஆங்காங்கே கதவுகளின் பின்னாலும், நாற்காலிகளின் அடியிலும் ஒளிந்து கொண்டனர்.
இருப்பினும் அவர் தனது கைத்துப்பாக்கியில் இருந்த குண்டுகள் தீரும் வரையில் சுட்டார்.
இந்த துப்பாக்கிச்சூட்டில் 5 பேர் கொல்லப்பட்டனர். 8 பேர் படுகாயம் அடைந்தனர்.
அவர் இந்த தாக்குதலை நடத்தியபோது எந்தவொரு வார்த்தையும் பேசவில்லை என நேரில் கண்டவர்கள் சாட்சியம் அளித்துள்ளனர்.
சம்பவம் நடந்த பகுதியில் உடனடியாக காவல்துறையினரும், மீட்பு படையினரும் சூழ்ந்துகொண்டனர்.
தாக்குதல் நடத்திய வாலிபரை காவல்துறையினர் கைது செய்தனர்.
துப்பாக்கியில் குண்டுகள் தீர்ந்த நிலையில் அவர் காவல்துறையினரிடம் சரண் அடைந்தார்.
இந்தநிலையில், கைது செய்யப்பட்டவரிடம் காவல்துறையினர் தீவிரவிசாரணைகளை மேற்கொண்டு வருகின்றனர்.
