திராவிட முன்னேற்ற கழகத்தின் செயல் தலைவராக மு.க.ஸ்டாலின் தேர்ந்தெடுக்கப்பட்டுள்ளார்.திராவிட முன்னேற்ற கழகத்தின் செயல் தலைவராக திராவிட முன்னேற்ற கழகத்தின் பொருளாளரும், எதிர்க்கட்சித் தலைவருமான மு.க.ஸ்டாலின் தேர்ந்தெடுக்கப்படுவதாக திராவிட முன்னேற்ற கழகத்தின் பொதுக்குழுவில் தீர்மானம் நிறைவேற்றப்பட்டுள்ளது.
திராவிட முன்னேற்ற கழகத்தின் பொதுக்குழுக் கூட்டம் இன்று பொதுச்செயலாளர் க.அன்பழகன் தலைமையில் சென்னை அண்ணா அறிவாலயத்தில் நடைபெற்றது.
பொதுக்குழுக் கூட்டத்தில் மாநிலம் முழுவதும் உள்ள பொதுக்குழு உறுப்பினர்கள் மற்றும் நிர்வாகிகள் கலந்து கொண்டனர்.
பொதுக்குழுக் கூட்டத்தில் திராவிட முன்னேற்ற கழகத்தின் செயல்தலைவராக ஸ்டாலின் தேர்வு
செய்யப்பட்டுள்ளதாக அறிவிக்கப்பட்டதை அடுத்து, தலைவருக்கு உள்ள அனைத்து அதிகாரங்களும், செயல் தலைவருக்கு வழங்கப்படுவதாகவும் தீர்மானம் நிறைவேற்றப்பட்டது.
இந்த தீர்மானத்தை பொதுச்செயலாளர் அன்பழகன் முன்மொழிய, துரைமுருகன் வழிமொழிந்தார். திராவிட முன்னேற்ற கழகத்தின் சட்டவிதி 18இல் திருத்தம் செய்யப்பட்டு, அவர் செயல் தலைவராக நியமிக்கப்பட்டுள்ளார்.
இந்த அறிவிப்பை திராவிட முன்னேற்ற கழகத்தின் பொதுச்செயலாளரான க.அன்பழகன் அறிவித்தார்.
