மட்டக்களப்பு சின்ன ஊறணியில் பிரதான வீதியிலுள்ள பலசரக்கு கடையுடன் இணைந்த நகைக்கடை ஒன்றின் பின்பகுதி கதவை உடைத்து அங்கிருந்த 5 1/2 பவுண் தங்க ஆபரணங்கள் மற்றும் 85000 ரூபா பணம் ஆகியவற்றை கொள்ளையிட்ட சம்பவம் இன்று செவ்வாய்க்கிழமை (31) அதிகாலையில் இடம்பெற்றுள்ளதாக மட்டக்களப்பு தலைமையக காவல்துறையினர் தெரிவித்தனர்.
குறித்த கடையில் ஒருபகுதியில் பலசரக்கு வியாபாரமும் ஒருபகுதியில் நகை ஈடுபிடிக்கும் கடை வியாபாரமும் இடம் பெற்றுவந்த நிலையில் ஊரடங்கு சட்டம் காரணமாக மூடப்பட்டுள்ளது.
இந்த நிலையில் சம்பவதினமான இன்று காலையில் கடையின் முதலாளி கடைக்கு சென்ற நிலையில் கடையின் பின்பகுதி கதவு பூட்டு உடைக்கப்பட்டு அங்கிருந்த தங்க ஆபரணங்கள் மற்றும் பணம் என்பன கொள்ளையிடப்பட்டுள்ளது அங்கு பொருத்தப்பட்ட சிசிரி கமராவில் பதிவாகியுள்ளதுடன் குறித்த கொள்ளையன் முகத்தை மறைத்தபடி சூட்சகமாக கொள்ளையிட்டு சென்றுள்ளதாக காவல்துறையினரின் ஆரம்ப கட்ட விசாரணையில் தெரியவந்துள்ளது.
சம்பவ இடத்திற்கு காவல்துறை தடவியல் பிரிவு மற்றும் மோப்பநாய் சகிதம் காவல்துறையினர் சென்று தீவிர விசாரணையினை மேற்கொண்டு வருகின்றனர்.
இது தொடர்பான மேலதிக விசாரணைகளை மட்டு தலைமையக காவல்துறையினர் மேற்கொண்டு வருகின்றனர்
