யாழ்ப்பாணம் ஆஸ்பத்திரி வீதியின் நடுவில் இலங்கை வங்கிக்கு முன்பாக வீற்றிருந்த பழைமைவாய்ந்த பெரும் மரமொன்று நேற்று (01) இரவு வேருடன் சரிந்து விழுந்தது. இதன் காரணமாக வீதியின் ஒரு பக்க போக்குவரத்து முற்றாகத் தடைப்பட்டது.
சம்பவ இடத்துக்கு உடன் சென்ற மாநகர முதல்வர், ஆணையாளர் மற்றும் மாநகர பணியாளர்கள் குறித்த பகுதியில் விபத்துகள் ஏற்படாதவாறு போக்குவத்து முன்னாயத்தங்களை உடனடியாகச் செய்ததுடன் அம் மரத்தை அகற்றுவதற்கான நடவடிக்கைகளையும் மேற்கொண்டனர்.
அதன்படி இன்று அதிகாலையில் குறித்த பணி ஆரம்பிக்கப்பட்டு மாநகர மக்களின் போக்குவரத்துக்கு இடையூறுகள் ஏற்படாதவாறு மாநகரசபை பணியாளர்களால் மரத்தின் பாகங்கள் முற்றாக அகற்றப்பட்டு அப்பகுதி தூய்மைப்படுத்தப்பட்டது.
அத்துடன் குறித்த பழைமை வாய்ந்த மரம் இருந்த இடத்தில் புதிய மரம் ஒன்றை நடுவதற்கும் யாழ்.மாநகர சபை நடவடிக்கை எடுக்கவுள்ளது.
குறித்த மரமானது நிழல் தரும் விருட்சமாகவும் போர் காலத்தில் மக்களுக்கு பாதுகாப்பு அரணாகவும் செயற்பட்டமை நினைவுகூரத்தக்கது.
