பதுளை – பசறை மூன்றாம் கட்டை பகுதியில் இன்று (12) பிற்பகல் சிற்றுந்து ஒன்று விபத்துக்குள்ளானதில் ஒருவர் உயிரிழந்ததுடன், 11 பேர் காயமடைந்துள்ளதாக பசறை காவல் துறையினர் தெரிவித்துள்ளனர்.
பதுளையிலிருந்து தியனகல தோட்டத்தை நோக்கி பயணித்த சிற்றுந்து ஒன்றே இவ்வாறு விபத்துள்ளாகியுள்ளது. சாரதி சிற்றுந்தை நிறுத்திவிட்டு கீழே இறங்கிச்சென்றுள்ளார்.
சிறிது நேரத்தில் குறித்த சிற்றுந்து தாமாக பின்னோக்கி சென்றுள்ள நிலையில், அதனை தடுத்து நிறுத்துவதற்காக சாரதி ஓடிச்சென்று அச்சிற்றுந்தில் ஏறியுள்ளார்.
எனினும், குறித்த வாகனம் கட்டுப்பாட்டை இழந்து குடைசாய்ந்ததில் இந்த விபத்து இடம்பெற்றுள்ளதாக சம்பவம் தொடர்பில் காவல்துறையினர் முன்னெடுத்த ஆரம்பக்கட்ட விசாரணைகளில் தெரியவந்துள்ளது.
சம்பவத்தில் சிற்றுந்தின் சாரதி உயிரிழந்துள்ளதுடன், அதில் பயணித்த 4 பெண்களும், 7 ஆண்களுமாக மொத்தமாக 11 பேர் சிறியளவான காயங்களுக்கு உள்ளான நிலையில் பதுளை வைத்தியசாலையில் அனுமதிக்கப்பட்டுள்ளதாக பதுளை காவல்நிலையத்தினர் தெரிவித்தனர்.
விபத்து தொடர்பாக பதுளை காவல்துறையினர் மேலதிக விசாரணைகளை மேற்கொண்டு வருகின்றனர்.
