1. Home
  2. தமிழ்நாடு
  3. குடியுரிமை திருத்த சட்டத்தை திரும்ப பெற மத்திய அரசிடம் வலியுறுத்தப்படும்- தேர்தல் அறிக்கையில் மு.க.ஸ்டாலின் உறுதி
தமிழ்நாடு

குடியுரிமை திருத்த சட்டத்தை திரும்ப பெற மத்திய அரசிடம் வலியுறுத்தப்படும்- தேர்தல் அறிக்கையில் மு.க.ஸ்டாலின் உறுதி

Posted on March 15, 2021 at 02:42 by தென்னவள்
513 0

தி.மு.க. தேர்தல் அறிக்கையில் திருத்தங்கள் செய்யப்பட்டுள்ளன. அதன்படி குடியுரிமை திருத்த சட்டத்தை திரும்ப பெற மத்திய அரசிடம் வலியுறுத்தப்படும் என்று மு.க.ஸ்டாலின் உறுதி அளித்துள்ளார்.

தமிழக சட்டமன்ற தேர்தலையொட்டி தி.மு.க.வின் தேர்தல் அறிக்கையை தி.மு.க. தலைவர் மு.க.ஸ்டாலின் நேற்றுமுன்தினம் வெளியிட்டார். இதில், தற்போது சில திருத்தங்கள் செய்யப்பட்டுள்ளன.. இதுகுறித்து மு.க.ஸ்டாலின் நேற்று வெளியிட்ட அறிக்கையில் கூறியிருப்பதாவது:-
சட்டமன்ற தேர்தலை முன்னிட்டு தி.மு.க.வின் சார்பில் வெளியிடப்பட்டுள்ள தேர்தல் அறிக்கையில் உள்ள வாக்குறுதி 43-ல், ‘விவசாயிகளுக்கு எதிரான சென்னை-சேலம் 8 வழிச்சாலைத் திட்டம் நிறைவேற்றப்படாது‘ என்பதையும், வாக்குறுதி 367-ல், ‘சுற்றுச்சூழல் தாக்க மதிப்பீட்டு வரைவு அறிவிக்கை 2020 நிராகரிக்கப்படும். காட்டுப்பள்ளித் துறைமுகம் அமைக்க அனுமதிக்கப்பட மாட்டாது‘ என்பதையும் இணைத்துக் கொள்ள வேண்டும் என்று அன்புடன் கேட்டுக்கொள்கிறேன்.
மேலும் வாக்குறுதி 500-ல் நேர்ந்துள்ள எழுத்துப் பிழையைப் பின்வருமாறு சரி செய்து, படித்திடவும் கேட்டுக் கொள்கிறேன்.
* இந்தியக் குடியுரிமைத் திருத்தச் சட்டம் 2019-ஐ திரும்பப் பெற மத்திய அரசிடம் வலியுறுத்தப்படும்.
* இலங்கையில் இருந்து வந்து, இந்தியாவில் உள்ள முகாம்களில் தங்கி இருக்கும் நாடற்ற இலங்கைத் தமிழர்களுக்கு, இந்தியக் குடியுரிமை வழங்கிட மத்திய அரசிடம் தொடர்ந்து வலியுறுத்தப்படும்.
இந்தியக் குடியுரிமைத் திருத்தச் சட்டம் 2019-ஐப் பொறுத்தவரை, அதை தொடக்கத்தில் இருந்தே எதிர்த்ததோடு மட்டுமின்றி, நானே வீதிகளில் இறங்கி ஒரு கோடி கையெழுத்துகளைப் பெற்று அச்சட்டத்தைத் திரும்பப் பெற வேண்டும் என்ற கோரிக்கை மனுவை ஜனாதிபதியிடம் தி.மு.க. கொடுத்திருக்கிறது. அத்துடன் நில்லாமல், தொடர்ந்து அந்தத் திருத்தச் சட்டத்தைத் திரும்பப் பெற வேண்டும் என்று தி.மு.க. வலியுறுத்தி வருகிறது.
எனவே, குடியுரிமைத் திருத்தச் சட்டத்திற்கு எதிராகச் சட்டமன்றத்தில் தீர்மானம் நிறைவேற்றப்பட்டு அச்சட்டம் ரத்து செய்யப்படுவதற்கு தி.மு.க. அழுத்தமான குரல் கொடுக்கும் என்று மீண்டும் தெரிவித்துக்கொள்கிறேன்.
இவ்வாறு அவர் கூறியுள்ளார்.