தமிழ் மக்களின் உரிமைகளைப் பெற்றுக்கொடுப்பதில் சர்வதேசம் அதிக கவனம் செலுத்தவேண்டும் என்றும் அதில் சுவிஸ்லாந்துக்கும் பொறுப்பு உண்டு என சுவிஸ்லாந்து தூதுவரிடம் இந்து மதத் தலைவர்கள் வலியுறுத்தியுள்ளனர்.
யாழ்ப்பாணத்துக்குச் சென்ற இலங்கைக்கான சுவிஸ்லாந்து தூதுவர் டொமினிக் ஃபேர்கலர், நல்லை ஆதினத்துக்கு நேற்று (புதன்கிழமை) மாலை சென்றிருந்தார்.
நல்லை ஆதீன குரு முதல்வர் ஸ்ரீலஸ்ரீ சோமசுந்தர தேசிக ஞானசம்பந்த பரமாசாரிய சுவாமிகள், இந்துக் குருமார் ஒன்றியத்தைச் சேர்ந்த பிரம்ம ஸ்ரீ கு.ஜெகதீஸ்வரக் குருக்கள், அகில இலங்கை இந்து மாமன்றத்தின் உப தலைவர் கலாநிதி ஆறு.திருமுருகன் மற்றும் சிவதொண்டன் சுவாமிகள் ஆகியோர் சுவிஸ்லாந்து தூதுவரைச் சந்தித்து கலந்துரையாடினர்.
வடக்கு – கிழக்கு தமிழ் மக்களின் தற்போதைய பிரச்சினைகள் தொடர்பாக சுவிஸ்லாந்து தூதுவர் இந்து மதத் தலைவர்களிடம் இதன்போது கேட்டறிந்தார்.
55 ஆயிரத்துக்கு மேற்பட்ட தமது உறவுகளுக்கு அடைக்கலம் கொடுத்து அவர்களுக்கான உரிமைகளை வழங்கியுள்ள சுவிஸ்லாந்துக்கு நன்றி தெரிவித்த இந்துமதத் தலைவர்கள், தமது மத வழிபாடுகளுக்கு ஆலயங்களை அமைக்க அனுமதித்துள்ளமைக்கும் பாராட்டுத் தெரிவித்தனர்.
அதேபோன்று இந்த நாட்டில் வாழும் தமிழ் மக்களுக்கு சகல உரிமைகளையும் கிடைக்க சுவிஸ்லாந்து ஒத்துழைக்கவேண்டும் என்றும் இந்து மதத் தலைவர்கள் வலியுறுத்தினர்.
