கிளிநொச்சி வட்டக்கச்சி,கட்சன் வீதியில் சட்டவிரோதமாக செயற்பட்ட மதுபான விற்பனை நிலையமொன்று விசேட பொலிஸ் குழுவின் அதிரடி நடவடிக்கையினால் இன்று சுற்றி வளைக்கப்பட்டுள்ளது.
இதன்போது , பல வகையான மதுபான போத்தல்கள் கைப்பற்றப்பட்டுள்ளதுடன், ஒருவர் கைது செய்யப்பட்டுள்ளதாக கிளிநொச்சி குற்றத்தடுப்பு பொலிஸார் தெரிவித்துள்ளனர்.
இதே வேளை குறித்த சம்பவத்துடன் தொடர்புபட்ட மற்றுமொருவர் தலைமறைவாகியுள்ளதாகவும், அவரையும் கைது செய்து கிளிநொச்சி மாவட்ட நீதவான் நீதிமன்றில் ஆஜர்படுத்த உள்ளதாகவும் பொலிசார் மேலும் தெரிவித்துள்ளனர்.
கிளிநொச்சி, முல்லைத்தீவு மாவட்ட பிரதி பொலிஸ்மா அதிபர் வெலிக்கன்ன அவர்களின் கட்டளைக்கமைய, கிளிநொச்சியில் சட்டவிரோத மது உற்பத்திகள், மது விற்பனைகள் மற்றும் கஞ்சா பொதிகள் மீட்கப்பட்டு வருகின்றமை குறிப்பிடத்தக்கது.
