மன்னார் மாவட்டத்தில் நேற்று ஞாயிற்றுக்கிழமை மேலும் 11 கொரோனா தொற்றாளர்கள் இனங்காணப்பட்டுள்ள நிலையில் மொத்த தொற்றாளர்கள் எண்ணிக்கை 207 ஆக அதிகரித்துள்ளது என மன்னார் மாவட்ட பிராந்திய சுகாதார சேவைகள் பணிப்பாளர் மருத்துவர் டி.வினோதன் தெரிவித்தார்.
மன்னாரில் இன்று இடம்பெற்ற ஊடகவியலாளர் சந்திப்பில் அவர் இவ்வாறு குறிப்பிட்டார். அவர் அங்கு மேலும் தெரிவித்தவை வருமாறு:
மன்னார் மாவட்டத்தில் பெப்ரவரி மாதம் வரை 190 கொரோனா தொற்றாளர்கள் அடையாளம் காணப்பட்டுள்ளனர். இவர்களில் 150 கொரோனா தொற்றாளர்கள் சமூகத்திலும், 40 தொற்றாளர்கள் மன்னார் மாவட்ட பொது வைத்தியசாலையிலும் அடையாளம் காணப்பட்டுள்ளனர்.
மன்னார் நகர பகுதியில் தற்போது கொரோனா தொற்றாளர்களின் எண்ணிக்கை குறைவடைந்து காணப்படுகின்றது.
எனினும் முசலி பிரதேசத்தில் தொற்றாளர்கள் அதிகளவில் அடையாளம் காணப்பட்டு வருகின்றனர். கொரோனா தொற்றுடன் அடையாளம் காணப்படுபவர்களின் குடும்ப உறவுகள் அதிகமானோர் தொற்றுடன் அடையாளம் காணப்படுகின்றனர்.
இது சமூகத்தில் வைரஸ் தொற்று அதிகரித்துச் செல்வதற்கு ஒரு அறிகுறியாகவுள்ளது.
எனவே பொது மக்கள் இந்த நிலைமையைக் கருத்தில் கொண்டு மிகவும் அவதானத்தோடும், விழிப்புணர்வுடனும் சுகாதார நடைமுறைகளைப் பின்பற்றி நடந்து கொள்ளுமாறு கேட்டுக்கொள்கின்றோம்.
நோயாளர்கள் மற்றும் வயோதிபர்களுக்கு கொரோனா தொற்று ஏற்படுகின்ற பட்சத்தில் அவர்களுக்கு மரணம் ஏற்படுவது தவிர்க்க முடியாதது.
தற்போது வரை மன்னார் மாவட்டத்தில் 8,962 பி.சி.ஆர்.பரிசோதனைகள் சமூகத்தில் மேற்கொள்ளப்பட்டுள்ளன.
பெப்ரவரி மாதம் 334 பி.சி.ஆர். பரிசோதனைகள் மேற்கொள்ளப்பட்டுள்ளன.
மேலும் சுகாதார சேவையில் பணியாற்றுகின்ற 91 சத வீதத்துக்கும் அதிகமான உத்தியோகத்தர்களுக்கு மன்னார் மாவட்டத்தில் முதலாவது கொரோனா தடுப்பூசி செலுத்தப்பட்டுள்ளது.
இவர்களுக்கான 2 ஆவது தடுப்பூசி 4 வாரங்களின் பின்னர் மீண்டும் செலுத்தப்படவுள்ளது.
இன்று மன்னார் பொலிஸ் நிலையத்தில் பணியாற்றும் 70 பொலிஸ் உத்தியோகத்தர்களுக்கு கொரோனா தடுப்பூசி செலுத்தும் நடவடிக்கை மேற்கொள்ளப்பட்டுள்ளது எனத் தெரிவித்தார்.
