ஜனாதிபதி வேட்பாளர் கோத்தபாய ராஜபக்ஸ ஜனாதிபதியாக வந்தவுடன் பெருந்தோட்டத் தொழிலாளர்களுக்கு 1000 ரூபா சம்பள உயர்வை வழங்க முடியும் என்றால் மகிந்த ராஜபக்ஸ ஜனாதிபதியாக இருந்த காலத்தில் தொழிலாளர்களுக்கு ஏன் சம்பள உயர்வை பெற்றுக் கொடுக்கவில்லையென தொழிலாளர் தேசிய சங்கத்தின் தலைவரும் மலைநாட்டு புதிய கிராமங்கள், உட்கட்டமைப்பு வசதிகள் மற்றும் சமூக அபிவிருத்தி அமைச்சருமான பி. திகாம்பரம் கேள்வி எழுப்பியுள்ளார்.
நடைபெறவுள்ள ஜனாதிபதித் தேர்தல் தொடர்பாக தொழிலாளர் தேசிய சங்கத்தின் தோட்டக் கமிட்டித் தலைவர்கள் மற்றும் முக்கியஸ்தர்களுடனான மக்கள் சந்திப்பு நேற்றுமுன்தினம் தொழிலாளர் தேசிய சங்கத்தின் அட்டன் பணிமனையில் இடம்பெற்றது. இதன்போதே அமைச்சர் மேற்கண்டவாறு கேள்வி எழுப்பினார்.
சங்கத்தின் பிரதி நிதிச் செயலாளரும், மத்திய மாகாண சபை முன்னாள் உறுப்பினரூமான சோ. ஸ்ரீதரன் தலைமையில் நடைபெற்ற இக்கூட்டத்தில் மத்திய மாகாண சபை முன்னாள் உறுப்பினர்களான சங்கத்தின் பிரதித் தலைவர் எம். உதயகுமார், உபதலைவர் எம். ராம், அட்டன்-டிக்கோயா முன்னாள் நகர பிதா டாக்டர் அழகமுத்து நந்தகுமார், தேசிய அமைப்பாளர் ஜி. நகுலேஸ்வரன் உட்பட பலர் கலந்து கொண்டார்கள்.
அமைச்சர் அங்கு தொடர்ந்தும் உரையாற்றுகையில்,
இந்த நாட்டின் அடுத்த ஜனாதிபதி சஜித் பிரேமதாஸவா அல்லது கோத்தபாய ராஜபக்ஸவா என்பதற்கான தேர்தல் இன்னும் ஒருமாதக்காலகப்பகுதிக்குள் நடைபெறவுள்ளது. இதை முழு நாட்டு மக்களுமே எதிர்பார்த்து காத்திருக்கின்றார்கள். கோத்தபாய வந்தால் என்ன நடக்கும் என்பது மக்களுக்கு நன்றாகத் தெரியும். யாரும் வாய் திறந்து பேச முடியாது. நாட்டில் அடக்கு முறையும் குடும்ப ஆட்சியும் மீண்டும் தலை தூக்கும் என்பதை மறந்து விடக் கூடாது.
மலையக இந்திய வம்சாவளி மக்கள் நாடற்றவர்களாக இருந்த போது அவர்களுக்கு பிரஜாவுரிமை வழங்கியவர் இன்றைய ஜனாதிபதி வேட்பாளர் சஜித் பிரேமதாஸவின் தந்தையாரான அமரர் ரணசிங்க பிரேமதாஸ என்பதை நாம் நன்றியுடன் நினைவு கூர வேண்டும். அவரது தந்தையின் வழியில் நாட்டை சுபீட்சமான பாதைக்குக் கொண்டு செல்லக் கூடிய ஒரு தலைவரான சஜித் தேவையா அல்லது ஆயிரக் கணக்கான மக்களை கொன்று குவித்து பெண்களை விதவைகளாக்கிய கொடுங்கோலர் கோத்தபாய தேவையா என்பதை மக்களே தீர்மானிக்க வேண்டும்.
பெருந்தோட்டத் தொழிலாளர்கள் தீபாவளிப் பண்டிகையை மகிழ்ச்சியோடு கொண்டாட வேண்டும் என்பதற்காக கம்பனிகள் வழங்கும் 10 ஆயிரம் ரூபா முற்பணத்துக்கு மேலதிகமாக 5 ஆயிரம் ரூபாவைப் பெற்றுக் கொடுக்க நாம் நடவடிக்கை எடுத்திருந்தோம். அதற்கு ஆதரவு தெரிவிப்பதாகக் கூறியவர்கள் அது கிடைக்குமா என்று சந்ததேகம் எழுப்பியிருந்தார்கள். அதேநேரம், அது தேர்தல் காலத்தில் மக்களுக்கு வழங்கப்படும் இலஞ்சம் என்று மலையக அரசியல்வாதிகள் சுட்டிக் காட்டி கிடைக்க விடாமல் தடுத்து நிறுத்தியுள்ளார்கள்.
மலையக மக்களுக்காக நீலிக் கண்ணீர் வடிக்கும் சில அரசியல்வாதிகள் 3 பாராளுமன்ற “சீட்” டும் 30 கோடி ரூபா பணமும் கேட்டு அது கிடைக்காத காரணத்தால் மாற்று வேட்பாளருக்கு ஆதரவு தருவதற்கு சென்று விட்டார்கள். இவர்கள் தான் 83 ஆம் ஆண்டில் இனக் கலவாரம் ஏற்பட்டபோது தமிழ் மக்கள் ஐ.தே.கட்சி அரசாங்கத்தின் காலத்தில் கொல்லப்பட்டதாகக் பிரசாரம் செய்து வருகின்றார்கள். அந்த நேரத்தில் இவர்களின் பெருந்தலைவர் அரசாங்கத்தோடு இருந்தார் என்பதை மக்கள் மறக்கவில்லை.
இந்த நிலையில் கோத்தபாய ராஜபக்ஸ ஜனாதிபதியாக வந்தவுடன் பெருந்தோட்டத் தொழிலாளர்களுக்கு நாளாந்தம் 1000 ரூபாவை வேதனமாக வழங்கப் போவதாக பிரசாரம் செய்கின்றார்கள். இந்த ஆயிரம் ரூபா கோரிக்கை கடந்த 10 வருடமாக இருந்து வருகின்றது. இதை கம்பனிகள் தான் வழங்க முடியுமே தவிர, அரசாங்கத்தால் வழங்க முடியாது. அவ்வாறு கோத்தபாய ஜனாதிபதியாக வந்து வழங்க முடியும் என்றால் இதற்கு முன்னர் ஜனாதிபதி பதவியில் இருந்த மகிந்த ராஜபக்ஸவினால் ஏன் வழங்க முடியவில்லை. அவருடைய காலத்திலும் ஆயிரம் ரூபா கோரிக்கையை முன்வைத்து தொழிலாளர்கள் போராட்டம் நடத்திய போது அவர் ஏன் கண்டுகொள்ளவில்லை?
எனவே, மலையக மக்களின் வாக்குகளைப் பெற்றுக் கொள்வதற்காக மேற்கொள்ளப்படும் இத்தகைய போலியான வாக்குறுதிகளை நம்பி மக்கள் ஏமாந்து விடக் கூடாது என்றார்.
