இலங்கையின் ஏற்றுமதிகளுக்கு புதிய சந்தைகளை உருவாக்கிக் கொள்ளும் நிமித்தம் மேலும் 3 வர்த்தக ஒப்பந்தங்கள் தொடர்பில் நாம் பேச்சுக்களை நடத்தி வரு கிறோம். இந்தியாவுடனான ஒப்பந்தமொன்றும் சீனா மற்றும் சிங்கப்பூருடன் தலா ஒரு இருதரப்பு ஒப்பந்தங் களும் இவற்றில் அடங்கும். அத்துடன் அம்பாந்தோட்டையில் சீனாவுக்காக 15000 ஏக்கர் காணிகள் ஒதுக்கப்பட்டுள்ளன என்று பிரதமர் ரணில் விக்கிரமசிங்க தெரிவித்தார்.
யுத்தம் இடம்பெற்ற பிரதேசங்களில் இடம்பெயர்ந்தவர்களுக்கு 65 ஆயிரம் வீட்டுத் தொகுதிகளை நிர்மாணிப்போம். தோட்டப் பகுதிகளில் வீடுகளுக்கான தேவைகளில் 65 சதவீதத்தை 2020 ஆம் ஆண்டாகும் போது பூர்த்தி செய்வதே எமது இலக்காகும் என்றும் பிரதமர் சுட்டிக்காட்டினார்.
ஏற்றுமதி மற்றும் இறக்குமதி கட்டுப்பாட்டு சட்டத்திற்கு பதிலாக புதிய சட்டமொன்று அறிமுகப்படுத்தப்படும். அது சிங்கப்பூர் ஏற்றுமதி மற்றும் இறக்குமதி ஒழுங்குவிதிகள் சட்டத்திற்கும் மூலோபாய பொருட்கள் கட்டுப்பாட்டு சட்டத்திற்கும் சமப்படுத்தப்படக்கூடியதாக இருக்கும் என்றும் அவர் குறிப்பிட்டார்.
பாராளுமன்றத்தில் நேற்று வியாழக்கிழமை நாட்டின் பொருளாதார நிலைமை, தேசிய அரசாங்கத்தின் எதிர்கால திட்டங்கள் தொடர்பாக விளக்கமளிக்கும் வகையில் விசேட கூற்றை முன்வைத்த பிரதமர் ரணில் விக்கிரமசிங்க மேற்கண்டவாறு குறிப்பிட்டார்.
பிரமரின் முழுமையான விசேட கூற்று வருமாறு,
மக்களின் வருமான மட்டங்களை கூடிய விரைவில் உயர்த்துவதே எமது இலக்காகும். கடந்த 60 ஆண்டு காலத்திலான வருமான அதிகரிப்பு நிலைமையை ஆராய்ந்து பார்க்கும் போது பெரும்பாலான தென்கிழக்காசிய நாடுகளை விடவும் நாம் மிகவும் பின்னிலையிலேயே இருக்கிறோம். அதேபோல், எமது அருகிலுள்ள தெற்காசிய நாடுகளின் வருமான மட்டங்களுடன் ஒப்பிடும் போது நாம் மட்டுமட்டளவில் நெருங்கியுள்ளோம். தற்போது தனிநபர் மொத்த தேசிய வருமானம் 4 ஆயிரம் அமெரிக்க டொலராக உள்ளது. அதை நாம் 8 ஆயிரம் அமெரிக்க டொலராக அதிகரித்துக் கொள்ள வேண்டும்.
பொருளாதார வளர்ச்சி
தற்போது எமது பொருளாதார வளர்ச்சி வேகம் வருடத்திற்கு 5 சதவீதமாக இருக்கிறது. இந்த வேகத்தில் சென்றால் தனிநபர் வருமானம் இரு மடங்காவதற்கு நாம் 2033 ஆம் ஆண்டு வரை காத்திருக்க வேண்டிவரும். பொருளாதார வளர்ச்சி வேகத்தை 7 சதவீதமாக பேணிக்கொள்ள முடிந்தால் தனிநபர் வருமானத்தை 2025 ஆம் ஆண்டாகும் போது இரு மடங்காக்கி கொள்ளலாம்.
2009 ஆம் ஆண்டு யுத்தம் நிறைவடைந்தன் பின்னரே கடைசியாக எமது நாட்டின் பொருளாதார வளர்ச்சி வேகம் 7 சதவீதமாக இருந்திருந்தது. துரதிர்வஸ்சமாக சமாதானத்துடன் கிடைத்திருக்க வேண்டிய பொருளாதார பிரதிபலன்களை எம்மால் பெற முடியாமல் போயிருந்தது. தற்போது உலக வங்கி, சர்வதேச நாணய நிதியம் மற்றும் ஆசிய அபிவிருத்தி வங்கி என்பன மட்டுமல்லாது, ஐரோப்பா,ஜப்பான் மற்றும் அமெரிக்கா ஆகிய நாடுகளுக்கு கடன் வழங்கும் ஏனைய நிதி நிறுவனங்களும் சலுகை வட்டி வீதத்தில் எமது அரசுக்கு கடன் வழங்க மீண்டும் முன்வந்துள்ளன. அதன் மூலம் எமது பொருளாதாரத்தை விஸ்தரித்துக் கொள்ளவும் பலப்படுத்திக் கொள்ளவும் கூடியதாக இருக்கும். நான் இதற்கு முன்னர் பிரதமராக பதவி வகித்த 2001 – 2004 காலப்பகுதியில் தான் இவ்வாறான சர்தேச நிதி அணுசரனைகள் இறுதியாக இலங்கைக்கு கிடைத்திருந்தன. தற்போது மீண்டும் ஜனாதிபதி சிறிசேனவினாலும் என்னாலும் மீண்டும் வெளிநாட்டு நிதி உதவிகளை மென்மேலும் பெற்றுக் கொள்ள முடிந்துள்ளது.
பிராந்திய உறவு
பிராந்தியத்திலுள்ள பல்வேறு நாடுகளுடனும் இலகுவாக தொடர்புகளை பேணும் நிமித்தம் சர்வதேச விமானநிலையம் மற்றும் 3 துறைமுகங்களின் அபிவிருத்தி நடவடிக்கைகளை நாம் ஆரம்பித்துள்ளோம். மூலதன கொடுப்பனவு மற்றும் குறைவான வரி முறைமையொன்றை அடிப்படையாகக் கொண்ட முதலீட்டு ஊக்குவிப்பொன்றை நாம் அறிமுகப்படுத்தவுள்ளோம். இது தொடர்பான மேலதிக விபரங்கள் வரவு – செலவுத்திட்டத்தில் முன்வைக்கப்படும்.
புதிய சட்டம்
ஏற்றுமதி மற்றும் இறக்குமதி கட்டுப்பாட்டு சட்டத்திற்கு பதிலாக புதிய சட்டமொன்று அறிமுகப்படுத்தப்படும். அது சிங்கப்பூர் ஏற்றுமதி மற்றும் இறக்குமதி ஒழுங்குவிதிகள் சட்டத்திற்கும் மூலோபாய பொருட்கள் கட்டுப்பாட்டு சட்டத்திற்கும் சமப்படுத்தப்படக்கூடியதாக இருக்கும். எமது உள்நாட்டு தொழில்முயற்சியாளர்களுக்கும் இதில் பாரிய கடமை பொறுப்புகள் இருக்கின்றன. அவர்கள் போட்டித்தன்மையை மேம்படுத்தி ஏற்றுமதி உற்பத்திகளை அதிகரித்துக்கொள்ள முடியும். அதன்மூலம் தொழில் வாய்ப்புகளும் உருவாகும்.
ஜனாதிபதி சிறிசேனவும் நானும் கடந்த காலங்களில் பல்வேறு சந்தர்ப்பங்களிலும் வெளிநாட்டு பயணங்களை மேற்கொண்டு எமது நாடு தொடர்பில் ஆரோக்கியமான தோற்றப்பாடொன்றை ஏற்படுத்தியுள்ளோம். எமது அந்த முயற்சியின் பெறுபேறுகளை இப்போதே காணக்கூடியதாக இருக்கிறது. ஜி.எஸ்.பி. பிளஸ் வரிச் சலுகை 2017 ஆம் ஆண்டு ஜனவரி மாதத்தில் இருந்து இலங்கைக்கு மீண்டும் வழங்கப்படும் என்று அண்மையில் பிரசல்ஸ் நகருக்கும் மேற்கொண்டிருந்த விஜயத்தின் போது ஐரோப்பிய ஆணைக்குழுவின் உயர் அதிகாரிகள் நம்பிக்கையுடன் உத்தரவாதமளித்தனர்.
அதுமட்டுமல்லாது ஜப்பான் – இலங்கை முழுமையான ஒத்துழைப்பை ஒருங்கிணைப்பதற்காக ஜப்பான் பிரதமரினால் சிரேஷ்ட அதிகாரியொருவர் நியமிக்கப்பட்டுள்ளார். எமது ஏற்றுமதிகளுக்கு புதிய சந்தைகளை உருவாக்கிக் கொள்ளும் நிமித்தம் மேலும் 3 வர்த்தக ஒப்பந்தங்கள் தொடர்பில் நாம் பேச்சுக்களை நடத்திவருகிறோம். இந்தியாவுடனான ஒப்பந்தமொன்றும் சீனா மற்றும் சிங்கப்பூருடன் தலா ஒரு இருதரப்பு ஒப்பந்தங்களும் இவற்றில் அடங்கும்.
துறைமுகங்கள் மற்றும் விமானநிலையங்களுக்காக செலுத்த வேண்டியுள்ள நிலுவைக்கடன் தொகைகளை ஈடுசெய்வதற்கு எமக்கு பலம் இருக்கிறது. ஆகையால் அம்பாந்தோட்டை துறைமுகம் மற்றும் விமானநிலைய கடன்களை எமது பிள்ளைகளின் மீது சுமத்தமாட்டோம் என்று உறுதியளிக்க முடியும். அதேபோன்று அம்பாந்தோட்டையை சர்வதேச விமான மற்றும் கப்பற்துறை சேவை கேந்திரநிலையமாக உருவாகுக்கும் பயனும் எமக்கு கிடைக்கும்.
நகரங்கள் மற்றும் அதன் சுற்றுபுறங்களிலுள்ள மத்திய வகுப்பு குடும்பங்களுக்கு 5 இலட்சம் வீடுகளையும் நகரங்களில் இருக்கும் குறைந்த வருமானம் கொண்டவர்களுக்கு 65 ஆயிரம் வீடுகளையும் நிர்மாணிப்பதற்கு வாய்ப்பேற்படுத்துவதே எமது திட்டமாகும். அதற்கு சமாந்தரமாக யுத்தம் இடம்பெற்ற பிரதேசங்களில் இடம்பெயர்ந்தவர்ளுக்கு 65 ஆயிரம் வீட்டுத் தொகுதிகளை நிர்மாணிப்போம். தோட்ட பகுதிகளில் வீடுகளுக்கான தேவைகளில் 65 சதவீதத்தை 2020 ஆம் ஆண்டாகும் போது பூர்த்தி செய்வதே எமது இலக்காகும்.
பாடசாலை கல்வி
13 ஆண்டுகள் பாடசாலை கல்வியை பெற்றுக்கொள்வதை நாட்டின் சகல பிள்ளைகளுக்கும் கட்டாயப்படுத்தும் புதிய கொள்கையொன்றை நாம் அறிமுகப்படுத்தியுள்ளோம். அடுத்த வருடம் இதன் முதன்மை திட்டத்தை நாம் ஆரம்பிப்போம்.
தற்போதைய நிலையில் எமது நாட்டின் பொருளாதாரத்திற்கு தேவையாக இருப்பது ஒழுங்குபடுத்தலே தவிர கட்டுபாடு கிடையாது. பொருளாதாரத்தை மிகவும் சுதந்திரமாக்குவதன் மூலமே செல்வமிக்க நாடாக உருவெடுக்கும் எதிர்பார்ப்பை யாதார்த்தமுள்ளதாக தக்க வைத்துக்கொள்ள முடியும். 1978 ஆம் ஆண்டு அறிமுகபடுத்தப்பட்ட திறந்த பொருளாதார கொள்கையின் விளைவாக மூடிய பொருளாதாரத்தினால் எமது நாட்டிற்கு ஏற்பட்டிருந்த பின்னடைவை போக்கிக் கொள்ள முடிந்திருந்தது. தற்போது அதன் மூன்றாவது தலைமுறையின் மறுசீரமைப்பொன்றை நோக்கி கொண்டு செல்லும் பாரிய சவாலொன்று எம்முன்னிலையில் இருக்கிறது. அந்த சவால்களுக்கு ஒன்றுபட்டு முகம்கொடுப்பதன் மூலமே இலங்கையை ஆசியாவின் நவீன பொருளாதார வெற்றியின் அடையாளமாக்கிக்கொள்ளமுடியும்.
இந்த பொருளாதார மறுசீரமைப்பு திட்டம் தொடர்பில் மேலதிக விபரங்கள் அடங்கிய நூலொன்றை நாம் விரைவில் வெளியிடுவோம்.
இலங்கை பொருளாதார ரீதியாக உயர்ந்து நிற்பதற்கு கிடைந்திருந்த பல சந்தர்ப்பங்களும் பல்வேறு காரணங்களால் துரதிஷ்டவசமாக எம்மைக் கைவிட்டு சென்றிருந்தது. மீண்டும் அவ்வாறு நடப்பதற்கு இடமளிக்க முடியாது. ஆகையால் தற்போதைய உலகளாவிய யதார்த்தங்கள் மற்றும் இலங்கையிடமுள்ள பலங்கள் மற்றும் வாய்ப்புகளை நாம் புரிந்துக்கொள்ள வேண்டும். அவை அனைத்திலும் பயன்காண வேண்டும்.
எம் அனைவருக்கும் பல்வேறு தனிப்பட்ட கருத்துக்கள் இருக்கலாம். அரசியல் நோக்கங்கள் இருக்கலாம். எனினும் அவை அனைத்திற்கும் மேலாக எமது நாட்டைப் பற்றி சிந்திக்குமாறு நான் அனைவரையும் கேட்டுக்கொள்கிறோன். தேசிய அரசாங்கத்தின் அடிப்படையில் நாட்டை முன்னோக்கி எடுத்துச் செல்லும் வாய்ப்புகளில் இருந்து நாம் உச்சப்பட்ச பலன்களை பெற்றுக்கொள்ள வேண்டும். புரட்சிகர முன்னேற்றத்தை நோக்கி எம்முடன் அனைவரும் ஒன்றிணையுங்கள் என்றார்.
