கோத்தபாய ராஜபக் ஷவை ஆதரிப்பதாக எடுத்த தீர்மானத்தின் மூலம் சுதந்திர கட்சியும் அதன் கொள்கைகளும் பாதுகாக்கப்பட்டுள்ளதாக அந்த கட்சியின் உபசெயலாளர்களில் ஒருவரான மஹிந்த சமரசிங்க தெரிவித்தார்.
சுதந்திரக்கட்சி தலைமையகத்தில் நேற்று புதன்கிழமை இடம்பெற்ற ஊடகவியலாளர் சந்திப்பின்போதே அவர் இதனைத் தெரிவித்தார்.
அவர் மேலும் தெரிவிக்கையில்,
உயிர்த்த ஞாயிறு தாக்குதலின் பின்னர் பாதுகாப்பு பிரச்சினை காணப்படுகிறது. அதற்கு முகங்கொடுக்க வேண்டும். இனப்பிரச்சினையும் இருக்கிறது. இலங்கை ஒரு பல்லின சமூகம் வாழும் நாடாகும். பல இன, மத, கலாசார மொழியைச் சேர்ந்த மக்கள் வாழும் பன்மைத்துவ நாடு. இதனடிப்படையில் நாடு கட்டியெழுப்பப்பட வேண்டும் என்ற சவால் இருக்கிறது. அத்துடன் பொருளாதார பிரச்சினையும் இருக்கிறது.
இந்த சூழ்நிலையிலேயே ஜனாதிபதித் தேர்தலை எதிர்கொள்ள வேண்டியுள்ளது. நாங்கள் பல விடயங்களை பரிசீலித்தமையினாலேயே ஜனாதிபதித் தேர்தலில் முடிவெடுப்பதற்கு காலத்தை எடுத்துக் கொண்டோம். இது நாட்டின் நன்மை கருதியேயாகும். எவ்வாறு இப்பிரச்சினைகளை தீர்க்க முடியும் என்று சிந்தித்தே இந்த முடிவுக்கு வந்துள்ளோம்.
நாட்டின் இறைமையை மக்களின் நல்வாழ்வை உறுதிப்படுத்தக்கூடிய சிறந்த நபர் யார் என்று சிந்தித்தே இந்த முடிவை எடுத்தோம். கட்சியினதும் நாட்டு மக்களினதும் நலன் கருதியே ஜனாதிபதித் தேர்தல் தொடர்பில் சிந்திப்பதற்கு சில வாரங்கள் எடுத்துக்கொண்டோம். இதனடிப்படையில் ஜனாதிபதி மைத்திரிபால சிறிசேனவுடன் ஆலோசித்து கோத்தபாயவை ஆதரிப்பது என்ற முடிவை எடுத்துள்ளோம்.
கோத்தபாய ராஜபக் ஷ நாட்டுக்கு புதியவர் அல்ல. சிறந்த நிர்வாகியாவார். அத்துடன் நாடு இக்கட்டான நிலைமையில் உள்ளபோது பாதுகாப்பு செயலாளராக பணியாற்றி சிறந்த பலாபலனை நாட்டு மக்களுக்கு பெற்றுத்தந்தவர். அவர் இவ்வாறான சகல சவால்களையும் எதிர்கொண்டார். அவர் நாட்டையும் நாட்டு மக்களையும் மதிப்பவராவார். எனவே தான் சு.க அவரை ஆதரிக்க தீர்மானித்தது.
கோத்தபாயவை ஆதரிப்பதில் ஐக்கியமாகவே இருக்கின்றோம். இதில் தனிப்பட்ட நிகழ்ச்சி நிரல் என்று எதுவும் இல்லை. சு.க.வும் அதன் கொள்கைகளும் இம்முடிவின் மூலம் பாதுகாக்கப்பட்டுள்ளது. நாட்டுக்கு முன்னுரிமை கொடுத்து இம்முடிவை எடுத்துள்ளோம். நாட்டின் பன்முகத் தன்மை பாதுகாக்கப்பட வேண்டும். இவை அனைத்தும் தேர்தல் விஞ்ஞாபனத்தில் தெரிவிக்கப்படும்.
பாரிய வெற்றி பெறுவோம் என்பதில் எவ்வித ஐயமும் இல்லை. இதன் அடிப்படையில் நாடும் மக்களும் வளம் பெறுவர் என்றார்.
