மலையக மக்களின் நலன்கருதி அடுத்த ஐந்துவருட காலத்தினுள் ஐம்பதாயிரம் வீடுகள் அமைக்கப்பட உள்ளன. மலைநாட்டு புதிய கிராமங்கள் அபிவிருத்தி அமைச்சும் மனித வள அபிவிருத்தி நிதியமும் இது தொடர்பில் முனைப்புடன் செயற்பட்டு வருகின்றன என்று முன்னாள் பிரதியமைச்சர் வி. புத்திரசிகாமணி தெரிவித்தார். மலையக வீடமைப்பு நிலைமைகள் குறித்து கருத்து வினவியபோதே அவர் இவ்வாறு தெரிவித்தார்.
இது தொடர்பில் அவர் மேலும் கருத்து தெரிவிக்கையில்;மலையக வீடமைப்பு என்பது ஒரு நீண்டகால பிரச்சினையாக இருந்து வருகின்றது. கடந்த காலத்தில் முன்னெடுக்கப்பட்ட வீடமைப்பு நடவடிக்கைகள் மந்த கதியில் இருந்ததாகவும் பலரும் தெரிவித்திருந்தனர். மலையக மக்களின் லயத்து வாழ்க்கைக்கு முற்றுப்புள்ளி வைத்து தனி வீட்டு கலாசாரத்தை முன்னெடுக்க வேண்டிய தேவை காணப்படுகின்றது.
அத்தோடு இந் நடவடிக்கை துரிதப்படுத்தப்படுவதும் மிகவும் அவசியமாக இருக்கின்றது. இதன் ஒரு கட்டமாக ஐம்பதாயிரம் வீடுகளை அடுத்த ஐந்தாண்டுக்குள் நிர்மாணிப்பதற்கு உரிய நடவடிக்கைகள் மேற்கொள்ளப்பட்டுள்ளன. இதில் முதற்கட்டமாக மண்சரிவு மற்றும் இயற்கை அனர்த்தங்களால் பாதிக்கப்பட்டவர்களுக்கென்று வீடுகள் நிர்மாணித்துக் கொடுக்கப்பட்டு வருகின்றன. இதன் அடிப்படையில் ஆயிரக்கணக்கான வீடுகள் நிர்மாணிக்கப்பட்டுள்ளன.
மலைநாட்டு புதிய கிராமங்கள் அபிவிருத்தி அமைச்சும் மனிதவள அபிவிருத்தி நிதியமும் மலையக மக்களின் வீடமைப்பு கருதி விசேட திட்டங்களை வகுத்து அர்ப்பணிப்புடன் சேவையாற்றி வருகின்றன. சுமார் ஒரு இலட்சத்து 60 ஆயிரத்துக்கும் மேற்பட்ட வீடுகள் எமது மக்களுக்கு தேவையாக உள்ளது. எனினும் இந்த வீடுகளை நிர்மாணிப்பது தொடர்பில் பல்வேறு பிரச்சினைகள் காணப்படுகின்றன. தோட்டங்களில் தொழிலாளர்களின் தொகை கணிசமாக குறைவடைந்துள்ளது.
இந்நிலையில் கடன்களை பெற்றுக் கொடுத்து வீடமைப்பு நடவடிக்கைகளை மேற்கொள்வதில் பல்வேறு பிரச்சினைகள் காணப்படுகின்றன. இன்று தோட்டத்தில் நூற்றுக்கு 65 சதவீதமானவர்கள் தோட்டத்தில் வேலை இல்லாதவர்களாக உள்ளனர். தோட்டத்தில் வேலை இல்லாதவர்களுக்கு கடன் வசதிகளை எவ்வாறு பெற்றுக் கொடுப்பது? எவ்வாறு அறவிடுவது என்பது மிக முக்கிய பிரச்சினையாக உள்ளது. எனவே தோட்டத்தில் வேலை செய்யாதவர்கள் வீடமைப்பில் பிரச்சினையாகி உள்ளனர். தோட்டப் பகுதிகளில் இன்று அரச ஊழியர்கள் உள்ளனர். ஆசிரியர்கள், சமுர்த்தி உத்தியோகத்தர்கள், கிராம சேவகர்கள் என்று பலதரப்பட்டவர்களும் இதில் உள்ளடங்குகின்றார்கள். அரசாங்கப் பணிபுரிபவர்களுக்கு கடன் வழங்குவதற்கு வேறு திட்டங்களும் நிறுவனங்களும் உள்ளன.
அப்படியானால் அவர்களுக்கு காணிகளை பெற்றுக் கொடுப்பதில் பிரச்சினைகள் உள்ளன. இந்த நிலையில் வீடமைப்பு தொடர்பில் மேலெழும்பும் பிரச்சினைகளுக்கு நாம் அடுத்த ஆறு மாத காலத்திற்குள் உரிய தீர்வினை பெற்றுக் கொடுக்க வேண்டியுள்ளது.
ஏற்கனவே நிர்மாணிக்கப்பட்டுள்ள பல வீடுகள் தோட்டத்தில் வேலை இல்லாதவர்களுக்கு வழங்கப்பட்டுள்ளது. சிலர் கொழும்புக்கு வேலைவாய்ப்பு கருதி சென்றிருப்பதாகவும் தெரியவருகின்றது. இத்தகைய பல பிரச்சினைகளுக்கும் நாம் முகம்கொடுக்க வேண்டி இருக்கின்றது. எது எவ்வாறு இருப்பினும் அடுத்த ஐந்து வருட காலத்தினுள் ஐம்பதாயிரம் வீடுகளை மலையகத்தில் நிர்மாணிப்பது தொடர்பில் நாம் உறுதியுடனும் அர்ப்பணிப்புடனும் செயற்படுகின்றோம்.
அரசாங்கத்துடன் அதற்கான பேச்சுவார்த்தைகளும் இடம்பெற்று முடிந்துள்ள என்பதும் குறிப்பிடத்தக்கதாகும். வீடமைக்கும் முறை, நிதிகளை பெற்றுக்கொள்ளும் வழிமுறைகள் அரசாங்கத்தின் மூலமாக பெற்றுக் கொள்ளப்படும் உதவிகள் தொடர்பில் கலந்துரையாடல்கள் இடம்பெற்றுள்ளன. ஒரு வீடு கட்டுவதற்கு பத்து இலட்சம் ரூபாய் வரையில் தேவைப்படுகின்றது. எவ்வாறெனினும் வீடமைப்பு பணியினை நாம் செவ்வனே நிறைவேற்றியே தீருவோம்.
இதற்கு மேலாக தோட்டப்புற மக்களின் குடிநீர் வசதி, மலசலகூட வசதி என்பவற்றின் அபிவிருத்தி கருதி உலக வங்கி உள்ளிட்ட நிறுவனங்கள் பல மில்லியன் கணக்கான அமெரிக்க டொலர்களை வழங்கி உதவியுள்ளன. சிறுவர் அபிவிருத்தி நிலையங்களும் மலையகத்தில் அபிவிருத்தி செய்யப்படவுள்ளன. தாய் சேய் நல திட்டங்களும் விருத்தி செய்யப்பட இருக்கின்றன. போசாக்கு வேலைத் திட்டங்களும் இதில் உள்ளடங்கும். மலையக அபிவிருத்தி கருதி பெருந்தொகை பணம் கிடைத்துள்ளது. இது ஒரு வரப்பிரசாதமாகும்.
தோட்ட மக்களின் வீடமைப்பு கருதி கம்பனிகளும் தனியார் தோட்டங்களும் காணிகளை பெற்றுக் கொடுத்து வருகின்றன. காணிகளை பெற்றுக்கொள்வதில் சிரமங்கள் காணப்படவில்லை. இதுவும் ஒரு சாதக விளைவேயாகும் என்றார்.
