மக்களிடம் பிரபலமான கட்சியாக பொதுஜன பெரமுன தற்போது உள்ளமையினால் எதிர்வரும் தேர்தல்களில், தாமரை மொட்டு சின்னத்திலேயே போட்டியிட வேண்டுமென நாடாளுமன்ற உறுப்பினர் கெஹெலிய ரம்புக்வெல தெரிவித்துள்ளார்.
மொட்டு சின்னம் தொடர்பாக எழுந்துள்ள சர்ச்சை குறித்து கருத்து தெரிவிக்கும்போதே அவர் இதனைக் குறிப்பிட்டுள்ளார். கெஹெலிய மேலும் கூறியுள்ளதாவது, “ஸ்ரீலங்கா சுதந்திரக் கட்சி சார்பில் நியமிக்கப்படும் ஜனாதிபதி வேட்பாளரால் ஒருபோதும் ஜனாதிபதித் தேர்தலில் வெற்றிபெற முடியாது என்பதை அக்கட்சியினர் அறிவார்கள் .
இந்நிலையில் சுதந்திரக் கட்சியும் பொதுஜன பெரமுனவும் இணைவதை விரும்பாத பலர், ஜனாதிபதி வேட்பாளரான கோட்டாபய ராஜபக்ஷ, மொட்டுச் சின்னத்திலன்றி வேறு சின்னத்தில் போட்டியிட வேண்டுமென வலியுறுத்தி வருகின்றனர்.
ஆகையால் இவர்கள் கூறுவதனை எல்லாம் கவனத்தில் கொள்ள முடியாது. பொதுஜன பெரமுன மொட்டு சின்னத்தில்தான் போட்டியிடும்” என குறிப்பிட்டுள்ளார்.
