நாட்டு மக்களின் மனதில் இருக்கின்ற விடயங்களையே கர்தினால் மல்கம் ரஞ்சித் ஆண்டகை வெளியிட்டிருக்கின்றார்.தற்போதைய ஆட்சி தொடர்பில் நம்பிக்கையற்ற தன்மை அனைவர் மத்தியிலும் ஏற்பட்டுள்ளமையினை கர்தினால் சிறப்பாக வெளிப்படுத்தியிருக்கிறார் என்று கூட்டு எதிரணியின் பாராளுமன்றக் குழுத்தலைவரும் எம்.பி.யுமான தினேஷ் குணவர்தன தெரிவித்தார்.
புதிய அரசாங்கம் ஒன்றை மக்கள் தெரிவு செய்வதற்கு சந்தர்ப்பத்தை வழங்குவதற்கு அதிகாரத்தில் இருக்கின்ற தரப்பு முன்வரவேண்டும் என்றும் தினேஷ் குணவர்த்த குறிப்பிட்டார். அரசாங்கத்தை கடுமையாக விமர்சித்து கொழும்பு பேராயர் கர்தினால் மெல்கம் ரஞ்சித் ஆண்டகை தெரிவித்துள்ள கருத்துக்கள் குறித்து விபரிக்கையிலேயே அவர் இதனைக் கூறினார்.
இது தொடர்பில் தினேஷ் குணவர்த்தன எம்.பி. மேலும் குறிப்பிடுகையில்,
நாட்டில் தற்போதைய நிலைமை தொடர்பாகவும் நெருக்கடி நிலை குறித்தும் ஆழமாக சிந்தித்தே கர்தினால் மக்களுக்கு ஒரு செய்தியை வெளியிட்டிருக்கின்றார். அதனை ஆழமான முறையில் கவனிக்கவேண்டியது அனைவரதும் பொறுப்பாகும். உயிர்த்த ஞாயிறு தாக்குதல் நடைபெற்று மூன்று மாதங்கள் கடந்துவிட்டன. ஆனால் இதுவரையில் எந்தவொரு நடவடிக்கையும் சரியாக முன்னெடுக்கப்படவில்லை.
கைதுகள் இடம்பெற்றுள்ளன. எனினும் இன்னும் கைதுகள் தொடர்ந்துகொண்டே இருக்கின்றன. இதன்மூலம் சரியானதொரு நடவடிக்கை எடுக்கப்படவில்லை என்பது தெ ளிவாகின்றது. மக்களின் பாதுகாப்பு மற்றும் தேசிய பாதுகாப்பு குறித்து அதிகாரத்தில் இருக்கின்றவர்கள் கவனம் செலுத்தவில்லை என்பது தெளிவாகின்றது. இவ்வாறு மக்களுக்கான தேவையை நிறைவேற்ற முடியாவிடின் வீட்டுக்கு செல்லுமாறே கர்தினால் கூறியிருக்கின்றார்.
இதன்மூலம் மக்களின் மனதில் இருக்கின்ற பொதுவான விடயத்தை பேராயர் கர்தினால் மெல்கம் ரஞ்சித் ஆண்டகை வெளிப்படுத்தியிருக்கின்றார். இன்று நாடு பொருளாதார ரீதியிலும் அரசியல் ரீதியிலும் பாரிய நெருக்கடியில் சிக்கியிருக்கிறது. மக்கள் நம்பிக்கையற்றவர்களாக இருக்கின்றனர். எனவே இந்த நிலைமை நீடிப்பதற்கு இடமளிக்க முடியாது. அதனால் விரைவாக மக்களுக்கு புதிய ஆட்சியை அமைப்பதற்கான சந்தர்ப்பம் ஏற்படுத்திக் கொடுக்கப்படவேண்டும். அதனூடாக புதிய அரசாங்கமொன்றை மக்கள் தெரிவுசெய்வார்கள் என்றார்.
