கூட்டு ஒப்பந்தத்தில் அதிகரிக்கப்பட்ட சம்பளத்துக்கு மேலதிகமாகப் பெருந்தோட்டத் தொழிலாளர்களுக்கு வரவு செலவுத்திட்டத்தில் உறுதியளிக்கப்பட்ட ஐம்பது ரூபா கொடுப்பனவைப் பெற்றுக்கொடுப்பதற்கு காலம் தாழ்த்தாது நிதி அமைச்சு நடவடிக்கை எடுக்க வேண்டும்.
ஏப்ரல் மாதம் முதல் இதுவரை காலப்பகுதியில் இந்த கொடுப்பனவு வழங்கப்படவில்லை. ஆரம்பத்தில் இவ்விடயம் தொடர்பில் பாரிய அழுத்தங்கள் கொடுக்கப்பட்டபோதும் அதுபற்றிய அக்கறை மழுங்கிவிட்டதாக பெருந்தோட்ட கைத்தொழில் இராஜாங்க அமைச்சரும் இலங்கை தேசிய தோட்ட தொழிலாளர் சங்கத்தின் பொதுச் செயலாளருமான வடிவேல் சுரேஸ் தெரிவித்தார்.
இலங்கை தேசிய தோட்ட தொழிலாளர் சங்கத்தின் இரத்தினபுரி மாவட்ட மாநில தலைவர்களின் கூட்டம் மாநில அமைப்பாளர் தர்மதாச த சில்வா, மாநில இயக்குனர் சிவலிங்கம் சிற்றரசு ஆகியோரின் ஏற்பாட்டில் பலாங்கொடையில் நடைபெற்றது.
இக் கூட்டத்தில் பிரதம அதிதியாகக் கலந்துகொண்டு உரையாற்றும் போதே இவ்வாறு தெரிவித்தார். இக்கூட்டத்துக்கு இலங்கை தேசிய தோட்ட தொழிலாளர் சங்கத்தின் நிர்வாக செயலாளர் வே.ருத்திரதீபன், தேசிய அமைப்பாளர் எஸ்.விஜயகுமார் உட்பட மாநிலங்களின் தலைவர்கள், தலைவிகள் உள்ளூராட்சி மன்றங்களின் உறுப்பினர்களும் கலந்துகொண்டனர்.
இதன்போது தொழிற்சங்கத்தின் எதிர்கால நடவடிக்கை தொடர்பாகவும் தோட்டங்களில் பெருந்தோட்ட கைத்தொழில் இராஜாங்க அமைச்சின் மூலம் முன்னெடுக்கப்படும் அபிவிருத்திகள் தொடர்பாகவும் ஆராயப்பட்டது.
இங்கு தொடர்ந்து பேசிய இராஜாங்க அமைச்சர்,
பெருந்தோட்டத் தொழிலாளர்களின் சம்பள உயர்வு தொடர்பில் கடந்த காலங்களில் பல போராட்டங்கள் முன்னெடுக்கப்பட்டன. 27 சுற்று பேச்சுவார்த்தைகள் நடைபெற்றன. இதில் அனைத்து மக்களும் பிரதேச வேறுபாடுகள் இன்றி போராட்டங்களை நடத்தியதோடு இளைஞர் யுவதிகள் மற்றும் ஆசிரியர்களின் ஒத்துழைப்பும் கிடைத்தது. இதில் அனைவரினது கோரிக்கையும் ஆயிரம் ரூபா சம்பள அதிகரிப்பாக இருந்தது. எனது கோரிக்கையும் அதுவாகவே இருந்தது.
இருந்தும் இதற்கு கம்பனிகள் ஒத்துவராததினால் இரண்டுக்கும் இடைப்பட்ட ஒரு தொகையில் தொழிலாளர்களுக்கு நன்மை பயக்கும் விதத்தில் 700 ரூபா அடிப்படை சம்பளமும் 50 ரூபா விலைக் கொடுப்பனவும் மேலதிக இறாத்தலுக்கு தேயிலை 40 ரூபாவும் இறப்பருக்கு 45ரூபாவும் கட்டாயம் கிடைக்கும் வகையில் ஒப்பந்தம் கைச்சாத்திடப்பட்டது.
எனினும் மேலும் சம்பள அதிகரிப்பு வழங்க வேண்டும் என்ற மலையக தலைவர்களின் வேண்டுகோளுக்கு அமைய நாள் ஒன்றுக்கு 50 ரூபா பட்ஜெட் மூலம் நிதி அமைச்சின் ஊடாக வழங்குவதற்கு தீர்மானம் எடுக்கப்பட்டு உறுதியளிக்கப்பட்டது.இந்த கொடுப்பனவு ஏப்ரல் மாதம் முதல் வழங்கப்பட்டிருக்க வேண்டிய நிலையில் அது இன்னும் வழங்கப்படவில்லை. இதனை உடனடியாக வழங்க நிதி அமைச்சு நடிவடிக்கை எடுக்க வேண்டும்.
இதனை வழங்க மலையக ஏனைய தலைமைகளும் ஒன்றிணைந்து குரல் கொடுக்க வேண்டும். தோட்ட தொழிலாளர்களின் சம்பள விடயத்தில் இன்னும் ஒரு சரியான முடிவு வராமலிருப்பது வேதனைக்குரியது. இதற்கான பொறுப்பு மலையகத்தின் அனைத்து தரப்பிடமும் உள்ளது என்றும் கூறினார்.
