ஜனாதிபதி வேட்பாளர் பட்டியலில் கரு ஜயசூரிய, சஜித் பிரேமதாச, கோத்தபாய ராஜபக்ஷ, பசில் ராஜபக்ஷ மற்றும் சம்பிக்க ரணவக்க ஆகியோரின் பெயர்கள் உள்ளன. ஜனாதிபதி கனவில் உள்ள இவர்கள், கொழும்பு துறைமுகத்தின் கிழக்கு முனையத்தை விற்கும் அரசாங்கத்தின் முயற்சிகளில் தமது நிலைப்பாடு என்ன என்பதை தெரிவிக்க வேண்டும் என மக்கள் விடுதலை முன்னணி வலியுறுத்தியுள்ளது.
சம்பந்தனும், ஹக்கீம் உள்ளிட்ட முஸ்லிம் தலைமைகளும் ஜனாதிபதி மைத்திரியும், எதிர்க்கட்சி தலைவர் மஹிந்தவும் தத்தமது நிலைப்பாடுகளை உடன் அறிவியுங்கள் எனவும் அக்கட்சி கோரிக்கை விடுத்துள்ளது.
மக்கள் விடுதலை முன்னணியின் செய்தியாளர் சந்திப்பு நேற்று கட்சியின் தலைமையகத்தில் நடைபெற்றது. அதில் அக்கட்சியின் உறுப்பினர் லால்காந்த அதில் கலந்துகொண்டு கருத்து தெரிவிக்கும் போதே இவற்றை குறிப்பிட்டார்.
அவர் மேலும் குறிப்பிடுகையில்,
கொழும்பு கிழக்கு துரையடியை விற்கும் முயற்சியை அரசாங்கம் முன்னெடுத்து வருகின்றது. அம்பாந்தோட்டை துறைமுகத்தை விற்ற போது கொழும்பு துறைமுகத்தை கட்டியெழுப்ப முடியும் என்று அரசாங்கம் கூறியது. ஆனால் தற்போது கொழும்பு துரையடியையும் விற்கும் நடவடிக்கையை எடுத்து வருகின்றது. இதில் ஏற்கனவே ஒரு பகுதி சீனாவுக்கு விற்கப்பட்டு விட்டது. இப்போது ஏனைய பகுதியை இந்தியா -சீனா இணைந்த நிறுவனம் ஒன்றுக்கு விற்கும் நடவடிக்கையே முன்னெடுக்கப்பட்டு வருகின்றது.
இந்த முயற்சியை தோற்கடிக்க வேண்டும். பாராளுமன்றத்தில் எமது தலைமைகள் கேள்வி எழுப்பி வருகின்றன. எனினும் துறைமுகத்தில் எமது போராட்டம் முன்னெடுக்க முடியாத நிலைமை உள்ளது. எமது தொழிற்சங்கம் மாத்திரம் இல்லாது துறைமுக ஊழியர்கள் அனைவரும் இணைந்து எமது வளத்தை காப்பாற்ற நடவடிக்கை எடுக்க வேண்டும் என்ற கோரிக்கையை முன்வைக்கின்றோம்.
அதுமட்டும் அல்ல இந்த விடயத்தில் ஜனாதிபதியின் நிலைப்பாடு என்ன என்பதை அவர் கூற வேண்டும். இன்று ஜனாதிபதி குறித்து நாட்டு மக்கள் மத்தியில் நல்ல அபிப்பிராயம் இல்லை. ஆனாலும் அவர் இன்றும் ஜனாதிபதி என்பதால் அவருக்கு உள்ள பொறுப்பை உணர்ந்து செயற்பட வேண்டும். அதேபோன்று துறைமுகத்தை விற்கும் நடவடிக்கைக்கு ஜனாதிபதி என்ன கூறுகின்றார் என்ற நிலைப்பாட்டை முன்வைக்க வேண்டும்.
பிரதமர் குறித்து பேசி அர்த்தம் இல்லை. அவர் தான் இந்த விற்பனையின் தலைவர். ஆகவே அவர்களிடம் இது குறித்து கேட்பதில் அர்த்தம் இல்லை. அதேபோன்று மஹிந்த ராஜபக் ஷவும் இது குறித்து தனது நிலைப்பாட்டினை கூற வேண்டும். இன்று நாட்டில் குண்டு வெடித்தால் இனக் கலவரம் வந்தால் முதலில் வருபர்வர்கள். நல்ல விடயம். அதனை நாம் வரவேற்கின்றோம். அதேபோல் நாட்டினை விற்கும் நடவடிக்கையில் அவர்களின் நிலைப்பாடு என்ன என்பதையும் கூற வேண்டும்.
சம்பந்தனின் நிலைப்பாட்டையும் கூற வேண்டும். விடிந்ததில் இருந்து இரவு வரை தமிழ் மக்களின் பிரச்சினைகளை அவர் பேசுகின்றனர் என்று தெரியும். ஆனால் தேசிய பிரச்சினை ஒன்றில் அவர் வாய் திறந்ததை நாம் கண்டதில்லை. தமிழ் மக்களின் பிரச்சினைகளை பேசுகின்றாரே தவிர நாட்டின் முக்கிய வளங்களை விற்கும் முயற்சிகளை தடுக்க அவர்கள் எந்த கருத்துக்களையும் கூறியதில்லை. எனவே அவரும் இந்த விடயத்தில் தனது நிலைப்பாட்டை தெரிவி்க்க வேண்டும். சம்பந்தனும் தமிழ் தேசிய கூட்டமைப்பும் இலங்கையின் இனமாக தம்மை நினைத்தால் நாடு குறித்து அக்கறை இருந்தால், தமிழர்களும் இலங்கையர் என்ற எண்ணம் கொண்டிருந்தால் இந்த விடயங்களில் அவர்களின் உறுதியான நிலைப்பாடு என்ன என்பதை தெரிவிக்க வேண்டும். சுமந்திரன் மூலமாகவேனும் இதனை தெரிவிக்க வேண்டும்.
அத்துடன் ரவூப் ஹகீம் உள்ளிட்ட முஸ்லிம் தலைமைகள் தமது நிலைப்பாடு என்ன என்பதை தெரிவிக்க வேண்டும். இவர்களும் இஸ்லாம் உரிமைகள் முஸ்லிம் மக்களின் சுதந்திரம் என்று கூறிவருகின்றனர். தவிர தேசிய கருத்துக்களை இவர்கள் முன்வைத்ததாக தெரியவில்லை. அத்துடன் மலையக தலைவர்கள் அவர்களின் நிலைப்பாட்டையும் கூறவேண்டும். அதுமட்டும் அல்ல இன்று சிலரது பெயர்கள் ஜனாதிபதி வேட்பாளர் என்ற பட்டியலில் உள்ளன. இதில் ஒருவர் கரு ஜெயசூரிய, இன்று ஐக்கிய தேசிய கட்சியின் ஒரு பகுதியினர் இவரை தெரிவு செய்துள்ளதாக தெரிகின்றது. அதேபோன்று சஜித் பிரேமதாச இருக்கின்றார். இவரும் பட்டியலில் உள்ளார். ஆகவே இவர்கள் தமது தலைவர் ரணில் விக்கிரமசிங்கவின் செயற்பாட்டிற்கு உங்களின் நிலைப்பாடு என்ன என்பதை தெரிவிக்க வேண்டும்.
அதேபோன்று கோத்தபாய ராஜபக் ஷ அவரது நிலைப்பாட்டை கூற வேண்டும். இன்று அவருக்கு எதிராக சிறப்பு நீதிமன்ற விசாரணைகள் முன்னெடுக்கப்பட்டு வருகின்றன. இந்நிலையில் அவர் சிங்கப்பூரில் உள்ளதாகவும் அவருக்கு சுகவீனம் என்ற கருத்துக்களும் உள்ளன. இதன் உண்மை தன்மை என்னவென்று தெரியவில்லை. ஆனால் இவரும் தனது நிலைப்பாட்டை கூற வேண்டும். ஜனாதிபதி பட்டியலில் உள்ள இன்னொருவரான பசில் ராஜபக் ஷவும் இது குறித்து அவரது நிலைப்பாட்டை கூற வேண்டும். இறுதியாக சம்பிக்க ரணவக்கவும் ஜனாதிபதி வேட்பாளர் கனவில் இரகசியமாக சில வேலைத்திட்டங்களை முன்னெடுத்து வருகின்றார். ஆகவே இவர்கள் முதலில் நாட்டினை விற்கும் ஐக்கிய தேசிய கட்சியின் முயற்சியில் தத்தமது நிலைப்பாட்டை கூற வேண்டும். துறைமுகத்தை விற்பது என்பது நாட்டினை விற்பதற்கு சமமாகும். ஆகவே இன்று தேசிய வாதம் பேசும் இவர்கள் அனைவரும் முதலில் தமது நிலைபாட்டை கூற வேண்டும்.
துறைமுகத்தை மீட்டெடுக்க வேண்டும் என்ற நோக்கம் எமக்கு உள்ளது. ஆனால் தனித்து எம்மால் போராட முடியாது. அம்பாந்தோட்டை துறைமுகத்தை விற்க நடவடிக்கை எடுக்கப்பட்ட போது நாம் தனியாக போராட்டம் நடத்தினோம். ஆனால் அதில் எம்மால் வெற்றிபெற முடியவில்லை. அதிகமாக போராடி தோற்றுப்போனது நாம்தான். இப்போது கொழும்பு துறைமுகத்தை விற்க நடவடிக்கை எடுக்கபட்டு வருகின்றது. இதனையாவது நாம் அனைவரும் இணைந்து தடுக்க வேண்டும் எனவும் அவர் குறிப்பிட்டார்.
