அடிப்படைவாதிகளின் அச்சுறுத்தலையடுத்து முப்படைகளின் தீவிர சோதனை நடவடிக்கைகளின் பின்னர் அரச பாடசாலைகளின் கல்வி நடவடிக்கைகள் இன்று திங்கட்கிழமை முதல் ஆரம்பமாகியுள்ளது.
இதற்கமைவாக தரம் – 6 லிருந்து 13 ஆம் தர மாணவர்களுக்கான கற்றல் நடவடிக்கைகளை இன்று ஆரம்பிக்கவும், தரம் – 1 தொடக்கம் தரம் – 5 மாணவர்களுக்கான கல்வி நடவடிக்கைகளை எதிர்வரும் 13 ஆம் திகதி திங்கட்கிழமையிலிருந்து ஆரம்பிக்கவும் அரசாங்கம் தீர்மானித்துள்ளது.
உயிர்த்த ஞாயிறன்று தேவாலயங்கள் மீது மேற்கொள்ளப்பட்ட தொடர் தற்கொலை குண்டுத்தாக்குதலின் பின்னர் நாட்டில் பலத்த பாதுகாப்பு நடவடிக்கைகள் மேற்கொள்ளப்பட்டுள்ளன. குறிப்பாக பாடசாலைகளின் பாதுகாப்பை உறுதிப்படுத்தும் வகையில் நாடளாவிய ரீதியில் கடந்த ஒருவார காலமாக அனைத்து பாடசாலைகளினதும் பாதுகாப்பு குறித்து கவனத்தில் கொள்ளப்பட்டது.
அதன்படி பாதுகாப்பு கருதி பிற்போடப்பட்ட இரண்டாம் தவணை கல்வி நடவடிக்கைகள் பலத்த பாதுகாப்புக்கு மத்தியில் மீண்டும் ஆரம்பமாகவுள்ளன.
