மட்டக்களப்பு கூழாவடி பகுதியில் சந்தேகத்திற்கு இடமாக காணப்பட்ட பையினால் அப்பகுதியில் பெரும் பதற்றநிலை ஏற்பட்டுள்ளது. இந்த சம்பவம் நேற்று இடம்பெற்றுள்ளது.
கூழாவடி பகுதியில் வீதி ஓரத்தில் காணப்பட்ட பை ஒன்றினை அவதானித்த அப்பகுதி மக்கள் பொலிஸாருக்கு தகவல் வழங்கியுள்ளனர். இதனையடுத்து குறித்த இடத்திற்கு வந்த பொலிஸார், அப்பகுதிக்கான பாதுகாப்பு நடவடிக்கையை மேற்கொண்டதுடன், குண்டு செயலிழக்கச் செய்யும் பிரிவினருக்கும் தகவல் வழங்கியுள்ளனர்.
அதன் பின்னர் சம்பவ இடத்திற்கு வந்த குண்டு செயலிழக்கச் செய்யும் பிரிவினர் குறித்த பையினை சோதனையிட்டபோது, அதிலிருந்து வீடியோ கமரா, சார்ஜர், கோட்வயர் என்பவற்றை மீட்டுள்ளனர்.
மேலும் மீட்கப்பட்ட பொருட்கள் குண்டு செயலிழக்கச் செய்யும் பிரிவினரால் சோதனைக்கு உட்படுத்தப்பட்டு மேலதிக சோதனை நடவடிக்கைக்காக கொண்டுசெல்லப்பட்டுள்ளதாக பொலிஸார் தெரிவித்துள்ளனர்.
