ராகுல்காந்தி அறிவித்துள்ள குறைந்தபட்ச ஊதிய உறுதித்திட்டம் வரவேற்கத்தக்கது என்று தி.மு.க. தலைவர் மு.க.ஸ்டாலின் கூறியுள்ளார்.
தி.மு.க. தலைவர் மு.க.ஸ்டாலின் வெளியிட்டுள்ள அறிக்கையில் கூறியிருப்பதாவது:-
காங்கிரஸ் ஆட்சிக்கு வந்தால் வறுமை கோட்டிற்கு கீழே உள்ளவர்களுக்கும், பொருளாதாரத்தில் பின்தங்கியுள்ள ஏழைகளுக்கும் மாதம் தோறும் 6 ஆயிரம் ரூபாய் வழங்கும் குறைந்தபட்ச ஊதிய உறுதித்திட்டத்தை அமல்படுத்துவோம் என்ற காங்கிரஸ் தலைவர் ராகுல்காந்தியின் திட்டத்தை தி.மு.க. சார்பில் மனமார வரவேற்கிறேன். பிரதமர் நரேந்திரமோடி தலைமையிலான கடந்த 5 ஆண்டு கால பா.ஜ.க. ஆட்சியில் ஏழைகளின் வாழ்வாதாரம் தான் முதலில் பறிக்கப்பட்டது. விலைவாசி உயர்வு, சமையல் கியாஸ் விலை உயர்வு, பெட்ரோல், டீசல் விலை உயர்வு, பண மதிப்பிழப்பு நடவடிக்கை, ஜி.எஸ்.டி. சட்டம் போன்றவற்றால் பல லட்சக்கணக்கான சிறு தொழில்கள் நாடு முழுவதும் மூடப்பட்டன. வேலை வாய்ப்பின்மை 45 வருடங்களில் இல்லாத அளவிற்கு பா.ஜ.க. ஆட்சியில் ஏற்பட்டுவிட்டதாக அதிகாரபூர்வமான ஆய்வு முடிவுகளே வெளிப்படுத்தின.
இந்நிலையில் ராகுல்காந்தியின், குறைந்தபட்ச ஊதிய உறுதித்திட்டம் மூலம் 25 கோடி ஏழைகள் மாதந்தோறும் 6 ஆயிரம் ரூபாய் என்ற அடிப்படையில் ஆண்டுக்கு 72,000 ரூபாய் பெறுவார்கள் என்ற அறிவிப்பு பா.ஜ.க.வின் பாசிச ஆட்சியில் ஏங்கித் தவித்துக் கொண்டிருக்கின்ற ஏழைகளுக்கு ஏற்ற வரப்பிரசாதம் மட்டுமல்ல, ஒரு அட்சய பாத்திரமாக கண்ணுக்குத் தெரிகிறது. ஏழைகளின் சிரிப்பில் இறைவனைக் காண்போம் என்றார் பேரறிஞர் அண்ணா. அதை ஏற்கனவே தி.மு.க. ஆட்சியில் திருமண நிதியுதவி உதவித்திட்டம், வேலை இல்லாத இளைஞர்களுக்கு மாதாந்திர ஊதியம் உள்ளிட்ட பல்வேறு நலத் திட்டங்கள் மூலம் தமிழகம் கண்டிருக்கிறது.
சமூக நலத்திட்டங்கள் மூலம் ஏழைகளையும் உள்ளடக்கிய வளர்ச்சியே ஒரு நாட்டிற்குத் தேவையான முதுகெலும்பு என்று நிரூபித்துக் காட்டியவர் தமிழகத்தின் முதல்-அமைச்சராக இருந்த கருணாநிதி. அதுபோல் இப்போது ராகுல்காந்தியால் அறிவிக்கப்பட்டுள்ள ஏழைகளுக்கு நிதி வழங்கும் திட்டத்தால் தமிழகத்தில் மட்டுமல்ல இந்தியாவில் உள்ள ஏழைகளின் முகத்தில் 5 வருடம் கழித்து இப்போதுதான் சிரிப்பைக் காண முடிகிறது.
இந்த திட்டத்தை செயல்படுத்த முடியாது என்று பா.ஜ.க.வினர் விதண்டாவாதம் செய்கிறார்கள். ஏன் நிதி ஆயோக்கின் துணை தலைவராக இருக்கும் ராஜீவ்குமார் பா.ஜ.க. பிரசாரகராகவே மாறி செயல்படுத்த முடியாத திட்டம் என்று சொல்கிறார். இது எரிச்சலின் வெளிப்பாடே தவிர துளியும் உண்மை அல்ல. ஏழைகளுக்கான இந்த குறைந்தபட்ச ஊதிய உறுதித்திட்டத்திற்கான நிதி ஆதாரத்தை திரட்டி, தி.மு.க-காங்கிரஸ் கூட்டணியால் வெற்றிகரமாக நிறைவேற்றி காட்டிட முடியும் என்பதில் எள்ளளவும் சந்தேகமில்லை. முதன்முறையாக இந்தியாவில் கொண்டுவரப்படும் இந்தத் திட்டத்திற்கு தி.மு.க. இதயபூர்வமான ஆதரவினைத் தெரிவித்து, ஜூன் 3-ந் தேதிக்குப் பிறகு ஏழைகள் இந்த நாட்டின் எஜமானர்கள் என்ற நிலை தி.மு.க-காங்கிரஸ் கூட்டணியால் உருவாகும்.
இவ்வாறு அறிக்கையில் அவர் கூறியுள்ளார்.
