நாவலபிட்டியிலிருந்து தலவாகலை நோக்கிப் பயணித்த முச்சக்கரவண்டி ஒன்று நாவலபிட்டி தலவாகலை பிரதான வீதியின் கடியஞ்சேன பகுதியில் வைத்து இன்று பகல் 2.30 மணியளவில் திடீரென தீ பிடித்து எரிந்துள்ளதாக தலவாகலை பொலிஸார் தெரிவித்தனர்.
நாவலபிட்டியிலிருந்து தலவாகலைக்கு பயணிகள் இருவரை ஏற்றிச் சென்ற போதே குறித்த முச்சக்கரவண்டி தீ பற்றி எரிந்துள்ளது.
முச்சக்கரவண்டியில் ஏற்பட்ட இயந்திரக் கோளாறே குறித்த தீ பரவலுக்கு காரணமென பொலிஸாரின் ஆரம்பக்கட்ட விசாரணைகளிலிருந்து தெரியவந்துள்ளது.
இந்நிலையில் முச்சக்கரவண்டியில் பயணித்த மூவருக்கும் எதுவித பாதிப்புக்களும் ஏற்பட்டாத போதிலும் முச்சக்கரவண்டி முற்றாக தீக்கிரையானது.
இதனையடுத்து சம்பவம் தொடர்பில் மேலதிக விசாரணைகளை தலவாகலை பொலிஸார் மேற்கொண்டு வருகின்றமை குறிப்பிடத்தக்கது.
