கடுவெல, கொடல்வத்தை பகுதியில் இன்று காலை மீட்கப்பட்ட சடலத்தை பொலிஸார் அடையாளம் கண்டுபிடித்துள்ளனர்.
கொடல்வத்தை பகுதியில் அமைந்துள்ள மைதானத்திற்கு அருகில், துப்பாக்கிச்சூட்டு காயங்களுக்கு உள்ளான நிலையில் நபரொரருவரின் சடலம் காணப்படுவதாக பிரதேச வாசிகளினால் பொலிசாருக்கு தகவல் வழங்கப்பட்டது.
அதற்கமைய குறித்த பகுதிக்கு விரைந்த பொலிசார் சடலத்தை மீட்டுள்ளதுடன், சடலம் காணப்பட்ட இடத்தில் மேற்கொள்ளப்பட்ட சோதனை நடவடிக்கைகளின்போது டீ.56 ரக துப்பாக்கிக்கு பயன்படுத்தப்படும் துப்பாக்கிரவைகள் சிலவும் மீட்கப்பட்டுள்ளன.
அத்துடன், உயிரிழந்தவர் கோணவல, களனிய பகுதியில் தற்காலிகமாக வசித்து வந்த 37 வயதுடைய வீரசிங்க ஆராச்சிகே சமில பிரசாத் கருணாரத்ன என அடையாளம் காணப்பட்டுள்ளார்.
கடந்த வருடம் டிசம்பர் மாதம் 12 ஆம் திகதி சபுகஸ்கந்த-கல்வெல சந்தியில் இரவு 8 மணியளவில் வியாரியொருவர் துப்பாக்கியால் சுட்டுக்கொலை செய்யப்பட்ட சம்பவமொன்று இடம்பெற்றது.
இந் நிலையில் இன்று சடலமாக மீட்கப்பட்ட நபர் அந்த கொலை சம்பவம் தொடர்பில் தேடப்பட்டு வந்த பிரதான சந்தேக நபரென்பதும் ஆரம்ப கட்ட விசாரணைகளின்போது தெரியவந்துள்ளது.
