சந்திரிகா பண்டாரநாயக்க குமாரதுங்க ஸ்ரீ லங்கா சுதந்திரகட்சிக்கு நெருக்கடியை ஏற்படுத்துவார் என நாம் நம்பவில்லை. அத்தோடு அவருடன் இணைந்து சுதந்திரகட்சிக்குள் குழுவொன்று கட்சியைவிட்டு வெளியேறப்போவதாக தெரிவிக்கப்படும் கருத்துக்களும் உண்மைக்கு புறம்பானவையாகும்.
முன்னர் இது போன்றதொரு தவறினைச் செய்து சில காலத்தின் பின்னர் அதனை உணர்ந்து அவர் ஸ்ரீலங்கா சுதந்திரகட்சியுடன் இணைந்து செயற்பட்டுள்ளார். எனவே அவர் மீண்டும் இவ்வாறானதொரு தவறினைச் செய்ய மாட்டார் என சுதந்திர கட்சியின் இளைஞர் முன்னணியின் தலைவர் பாராளுமன்ற உறுப்பினர் சாந்த பண்டார தெரிவித்துள்ளார்.
சுதந்திரகட்சி காரியாலயத்தில் நேற்று இடம்பெற்ற ஊடகவியலாளர் சந்திப்பின் போதே அவர் இதனைத் தெரிவித்தார்.
அங்கு தொடர்ந்தும் அவர் குறிப்பிடுகையில்,
பெரும்பாண்மை கிடைக்காது என்பது அவர்களுக்கே தெரியும்.
நாடளாவிய ரீதியிலுள்ள தமிழ் மக்கள் மற்றும் வடக்கு மக்களுக்கும் சுதந்திரகட்சிக்கும் இடைவெளியை ஏற்படுத்தவே அவர்கள் புதிய அரசியலமைப்பை உருவாக்குகின்றனர். உண்மையில் மக்களுக்கு நன்மை தரக்கூடிய வகையில் அரசியலமைப்பொன்றை உருவாக்க அவர்கள் விரும்பினால் ஸ்ரீலங்கா சுதந்திரகட்சி பெயரையும் குறிப்பிட்டு சகல கட்சிகளினதும் ஒத்துழைப்புடன் அதனை நிறைவேற்றுவோம் என தெரிவித்திருக்க வேண்டும். இருந்தும் அவர்கள் அவ்வாறு தெரிவிக்கவில்லை.
சுமந்திரன் போன்ற பிரிவினைவாதிகளால் அவ்வாறானதொரு அரசியலமைப்பு நிறைவேறுவதற்கு ஜனாதிபதி மைத்திரிபால சிறிசேன மற்றும் ஸ்ரீலங்கா சுதந்திரகட்சி என்பன ஒருபோதும் இடமளிக்காது. அத்தோடு அரசியலமைப்பு உருவாக்கத்தின் மூலம் நாட்டை கட்டியெழுப்ப முடியாது என்றார்.
