மோட்டார் வாகனம் பழுது பார்க்கும் இடத்தில் மறைத்து வைக்கப்பட்டிருந்த ரி 56 ரக துப்பாக்கி மற்றும் ரவைகளுடன் சந்தேகநபரொருவர் நேற்று ஊருபொக்க பொலிஸாரால் கைதுசெய்யப்பட்டுள்ளார்.
மதகொதரவத்த ஹுலங்கந்த தம்பஹல பிரதேசத்தைச் சேர்ந்த 36 வயதுடைய கங்கானம் கமகே என அழைக்கப்படும் உபுல் சஞ்சீவ என்பவரே இவ்வாறு கைதுசெய்யப்பட்டுள்ளார்.
ஊருபொக்க பொலிஸ் பிரிவுக்குட்பட்ட ஹீகொட சந்தியில் வைத்து இரவு 8.15 மணியளவில் மோட்டார் வாகனம் பழுது பார்க்கும் இடமொன்றில் வைத்து ஊருபொக்க பொலிஸாருக்கு வழங்கப்பட்ட தகவலுக்கமைய மேற்கொள்ளப்பட்ட தோடுதல் பணிகளில் போதே கைதுசெய்யப்பட்டார்.
அவரிடமிருந்து ரி 56 துப்பாக்கியும் மற்றும் அதன் 25 ரவைகளும் கைப்பற்றப்பட்டுள்ளன.
இந்நிலையில் குறித்த நபரிடம் மேற்கொள்ளப்பட்ட ஆரம்பக்கட்ட விசாரணைகளின் மூலம் குறித்த நபருக்கும் மோட்டார் பழுது பார்க்கும் இடத்திற்கும் எதுவித தொடர்பும் இல்லை என்பதும், இவர் மது பாவனைக்காக அப்பிரதேசத்தில் மறைவாக ஒதுங்கியதாகவும் இதன்போதே துப்பாக்கி மற்றும் ரவைகளை அப்பிரதேசத்தில் மறைத்து வைத்ததாகவும் தெரியவந்துள்ளது.
இந்நிலையில் குறித்த நபரை கைதுசெய்த ஊருபொக்க பொலிஸார் அவரை இன்று மொரவக நீதவான் நீதிமன்றில் ஆஜர்படுத்த நடவடிக்கை மேற்கொண்டுள்ளதோடு மேலதிக விசாரணைகளையும் மேற்கொண்டுள்ளனர்.
