விமானத்தில் பா.ஜ.வை விமர்சித்து கோஷம் எழுப்பிய மாணவி கைது செய்யப்பட்டார்.
துாத்துக்குடி, மூன்றாம் மைல், கந்தன் காலனியை சேர்ந்த ஓய்வுபெற்ற டாக்டர் சாமி மகள் சோபியா, 28. கனடா, மான்ட்ரியல் பல்கலையில் ஆராய்ச்சி மாணவியாக உள்ளார்.
விடுமுறையில் தாயகம் வந்தார்.சென்னையில் இருந்து துாத்துக்குடிக்கு தனியார் விமானத்தில் வந்தார். அதே விமானத்தில் பா.ஜ. மாநில தலைவர் தமிழிசையும் வந்தார்.விமானத்தில் தனது இருக்கைக்கு செல்லும்போது தமிழிசையை பார்த்து சோபியா கைகளை உயர்த்தி, பா.ஜ.வை விமர்சித்து கோஷங்களை எழுப்பியுள்ளார். இதனால் விமானத்திலேயே பரபரப்பு ஏற்பட்டுள்ளது. துாத்துக்குடியில் விமானம் தரையிறங்கிய பிறகும் இதுதொடர்பாக இருவருக்கும் இடையே வாக்குவாதம் ஏற்பட்டது.
மருத்துவமனையில் அனுமதி : சோபியாமீது தமிழிசை விமான நிலைய இன்ஸ்பெக்டர் நித்யாவிடம் புகார் அளித்தார். கைது செய்யப்பட்ட சோபியாவை, துாத்துக்குடி மூன்றாவது ஜே.எம்., நீதிமன்ற மாஜிஸ்திரேட் தமிழ்ச்செல்வி முன்னிலையில் ஆஜர்படுத்தினர்.சோபியாவை 15நாள் காவலில் வைக்க மாஜிஸ்திரேட் உத்தரவிட்டார்.
இந்நிலையில் உடல்நலக்குறைவு ஏற்பட்டதால் சோபியா துாத்துக்குடி அரசு மருத்துவமனையில் அனுமதிக்கப்பட்டார்.எதிர் தரப்பில் தமிழிசை உள்ளிட்ட பத்து பேர் மீது மாணவி சோபியாவின் தந்தை சாமி துாத்துக்குடி புதுக்கோட்டை போலீசில் புகார் அளித்தார்.
