குடியரசு கட்சி மூத்த தலைவர் ஜான் மெக்கைன் மறைவையொட்டி துக்கம் அனுசரிப்பதற்காக வெள்ளை மாளிகையில் அறைக் கம்பத்தில் பறந்த கொடியை முழு கம்பத்தில் ஏற்றி மீண்டும் இறக்கி பறக்கவிட்டு டிரம்ப் குழப்பத்தை ஏற்படுத்தியுள்ளார்.
அமெரிக்காவை ஆளும் குடியரசு கட்சியின் மூத்த தலைவர்களில் ஒருவர் ஜான் மெக்கைன் (வயது 81). இவர் 2008-ம் ஆண்டு நடந்த அமெரிக்க ஜனாதிபதி தேர்தலில், ஜனநாயக கட்சி வேட்பாளர் ஒபாமாவை எதிர்த்து குடியரசு கட்சி வேட்பாளராக போட்டியிட்டு தோல்வியை தழுவியவர்.
அமெரிக்காவுக்கும், வியட்நாமுக்கும் இடையே நடந்த போரில், போர் விமானியாக இருந்தவர் ஜான் மெக்கைன். அவரது விமானம் சுட்டு வீழ்த்தப்பட்டது. அவர் போர்க் கைதியாக சிறை பிடிக்கப்பட்டு, 5 ஆண்டுகள் சித்ரவதைகளை அனுபவித்து இருக்கிறார். அதன் பின்னர் வியட்நாம், அவரை விடுவித்தது. இதனால் அவர் வியட்நாம் போர் நாயகனாக கொண்டாடப்பட்டார்.
பின்னர் அரசியலில் குதித்து அமெரிக்க நாடாளுமன்றத்தின் செனட் சபையில், அரிசோனா மாகாணத்தில் இருந்து 6 முறை எம்.பி. பதவி வகித்து உள்ளார்.
ஆனால், ஒரே கட்சியை சேர்ந்த டிரம்பிற்கும் மெக்கைனுக்கும் கடந்த காலங்களில் பல்வேறு விவகாரங்களில் கருத்து வேறுபாடு ஏற்பட்டு மோதல்கள் நடந்துள்ளன. அமெரிக்க அதிபர் தேர்தல் பிரச்சாரத்தின் போது பேசிய டிரம்ப், அனைவரும் நினைப்பது போல் மெக்கைன் போர் நாயகன் எல்லாம் இல்லை என அவரை தாக்கி பேசியுள்ளார்.
ராணுவ தலைமையகமான பெண்டகன், அமெரிக்க உச்ச நீதிமன்றம் மற்றும் வெள்ளை மாளிகை போன்ற இடங்களில் நேற்று முன்தினம் முழுவதும் அறைக் கம்பத்தில் பறக்கவிடப்பட்ட அமெரிக்க கொடியை தனது முன் விரோதம் காரணமாக நேற்று மீண்டும் முழுக்கம்பத்தில் பறக்கவிட்டார் டிரம்ப்.
டிரம்பின் இந்த செயலால் அதிருப்தி அடைந்த பொதுமக்கள் ராணுவ வீரர்கள் மற்றும் மூத்த அரசியல்வாதிகள் உள்ளிட்டோர் அவரை கடுமையாக விமர்சித்தனர்.
